Accessibility links

чәршәмбе, 7 декабрь 2016, Казан вакыты 23:14

Tatarstan aviakompaniäse xucası alışındı


Respublika xökümäte Tatarstan aviakompaniäsen Nur-avia şirkätenä sattı. Aviakompaniä belän bergä Nur-avia üz qulına Begiş hawa alanı da töşerde. Älege hawa alanın KamAZ şirkäte dä üzeneke itmäkçe ide, läkin küräseñ, Nur-avia kompaniäse häm anıñ citäkçese Mannaf Säğdiev küräseñ qulayraq şartlar häm bäyä wäğdä itkän. Älegä xökümätkä tieşle aqçanıñ yartısı ğına tülänelgän, anıñ qalğan öleşen satıp aluçı ber yıl däwamında birep beterergä tieş, dip xäbär itä Kommersant gäcite. Xäyer, Nur-avia şirkäte Tatarstan aviakompaniäsenä çit tügel. Alar inde ber yıl diärlek älege aviaşirkät belän idärä itep kildelär. Xäzer menä üzläre xuca da buldı. Äle küptän tügel genä xäbär itkänebezçä, Tatarstan aviakompaniäse öçen Nur-avia 6 Bombardier oçqıçın satıp alırğa cıyına. Moña qädär kompaniäde çit il oçqıçları yuq ide. Tatarstan aviakompaniäsendä 20 oçqıç bar, şularnıñ 16 xezmät yulçılarğa xezmät kürsätä. Belgeçlär fikerençä, aviakompaniäneñ bazar bäyäse xäzerge köndä 20 million dollar tiräse.

Tatarstanda Perm’ ölkäse delegatsiäseneñ räsmi säfäre däwam itä. Ölkäneñ gubernatorı Oleg Çirkunov citäkçelegendäge wäkillär sişämbe könne Gorbunov isemendäge aviatsiä berläşmäsendä buldılar. Qunaqlarğa TU-214 oçqıçın cıya torğan cirne kürsättelär. Nigä näq menä TU-214 kürsätkännär perm’lılarğa dip sorasağız, cawabı da bar. Bu hawa qorablarına Perm’ dä eşlänelgän dvigatel’lär quyalar ikän.

Respublika parlamentı deputatları tarafınnan tatarstannıñ kiläse yılğa byudjetın tikşerü däwam itä. 31 oktäberdä Däwlät Şurasınıñ byudjet, salım häm finanslar komitetı utırışında 204 tözätmä qaraldı. Utırışta respublika xökümäte citäkçese Röstäm Miñnexanov ta qatnaştı. Tözätmälärgä kilgändä isä, alar nigezdä byudjetnıñ östämä keremnär öleşe, xoquq saqlaw organnarı eşçänlegenä häm iminlek tarmağına tağın beraz aqça bülep birügä qağıla.

Gölnaz İlgizär

XS
SM
MD
LG