Accessibility links

чәршәмбе, 7 декабрь 2016, Казан вакыты 13:44

Omskida “Zö-Läy-Lä” konsertı


Uzğan yal könnärendä Omski tatarları qaya barırğa, nindi çaranı saylarğa belmiçä , aptıraşta qaldılar disäm, yalğış bulmas. Çönki bu könnärdä tatar xalqı öçen ber ük waqıtta diärlek törle mädäni çaralar oyıştırılğan ide. Şimbä könne “Qızıl Gvardiä“ mädäniät sarayında “Umırzaya” sänğatkärläreneñ älege sarayda şöğellänüçelär belän berlektä yasağan çığışları, tatar milli mädäni moxtariäte binasında “Tanışu” klubınıñ çirattağı kiçäse , “Şinnik” mädäniät sarayında Tatarstan artistlarınıñ konsertı, yäkşämbe könne “Umırzaya” kollektivınıñ uraza ğayıtenä häm tanılğan kompozitor Sara Sadıyqova icatına bağışlanğan konsertı, Malunseva isemendäge mädäniät sarayında urta yäştägelär öçen yal kiçäse bulıp uzdı. Oyıştıruçılarnıñ uzara kileşep eşlämäwläre häm xalıqnıñ törle çaralarğa bülenüläre säbäple, çaralarnıñ barsı da bik küp xalıq qatnaşlığında ütte dip äytep bulmıy. Şulay da, xalıqnıñ azmı-küpme buluına qaramastan, çaralarnıñ barsı da bilgelängän waqıtında uzdı. Xalıqnı ayıruça cälep itkän çaralar, älbättä, Tatarstannan kilgän “Zö-Läy-Lä” törkemeneñ häm Omskinıñ “Umırzaya” sänğätkäyläreneñ konsertları buldı. Konsertlarnıñ ikesenä dä Omski möftie Zölkärnäy xäzrät Şakircanov kilgän ide. Ul konsertlarnıñ ikesendä dä säxnädän xalıqnı küptän tügel genä ütkän Uraza bäyräme belän täbrikläde, kileşep eşlämägännäre öçen oyıştıruçılarnı şeltäläp aldı, ike kollektivqa da çäçäk bäylämnäre büläk itte.

Mädäni çaralar küp buluğa qaramastan, “Zö-Läy-Lä” törkemeneñ dä, “Umırzaya” kollektivınıñ da konsertlarına tamaşaçı küpläp kilgän ide. Omskilılarğa inde “Umırzaya” ansamble tanış bulsa, “Zö-Läy-Lä” törkeme belän barsınıñ da berençe oçraşuı ide. Döres, Omski tamaşaçısına cırçı qızlarnıñ berse - Läysän Mäxmütova berniqädär tanış diärgä mömkin. 1997-nçe yılnı ul Rişat Yusupov citäklägän konsert törkeme belän Omskida bulıp kitkän ide.

“Zö-Läy-Lä” törkemeneñ qızları da, konsertta qatnaşqan yäş cırçı İlşat Valeev ta Omski tamaşaçısınnan qänäğät qaluları turında belderdelär. Tamaşaçılar da “Zö-Läy-Lä” konsertın yaratıp qaluları turında äyttelär. Döres, qızlarnıñ cırlarnı başqaru räweşen bik ük önäp betermäwlären beldergän apalar da buldı.

“Umırzaya” kollektivınıñ çığışı Qazan artistlarınnan soñ ikençe könne ük bulsa da, anda da tamaşaçı az bulmadı. Aralarında ike konsertnı da qarap, çağıştırıp, bäyä birüçelär dä buldı. “ Üzebezneñ qızlarıbız da “Zö-Läy-Lä” törkemennän naçar cırlamadılar. Äle artığraq ta bulğandır. Bez, ölkännär, xalıq cırların kübräk yaratabız, räxmät alarğa”, - didelär ölkän yäştäge xanımnar.

Konserttan soñ “Zö-Läy-Lä” qızları “Azatlıq” radiosı xäbärçese häm tatar xäräkäte aktivistlarınıñ oçraşuları buldı. Aralaşu barışında qızlar “Azatlıq” radiosına muzıkal' teläklären yulladılar.

Saniä Mirxaleeva,. Omski.

XS
SM
MD
LG