Accessibility links

Кайнар хәбәр

23 hektarlı säwdä mäydanı tözelä


23 hektar mäydan diyugä awıl balası bularaq zur bulmağan basu küz aldına kilä. Keçeräk fermerlar 17-20 hektar cirdä peçän yä börtekle kul''tura üsterälär dä, şul cirlärendä mäş kilälär. Ä monda 23 hektar mäydanda sklad, ofis tağın ällä närsälär bulaçaq dilär. Nilär qılandırıp betererlär, älegä küz aldına kitürü awır. Şul 230 meñ kv. metr mäydanlı qorı cirgä 130 million dollarğa yaqın aqça sibep kiläçäktä millionlağan tabış almaqçılar. Bu proyektnıñ 69.12 meñ kv.metrın 2007 yılnıñ cäyendä äwäläp betersälär, qalğanın 2009 yılda qullanuğa tapşırmaqçılar. Bu çit il investorı belän bu atna başında Tatarstannıñ ministrlar kabinetında älege proyekt buyınça ğap qordılar. Bu xaqta “Aqça häm waqıt”, “Kommersant” gazetaları zurlap yazıp çıqtı. “Quinn Group”- dip atala ul İrlandiä şirkäte. Gazetalar yazğança üzläre äytkänçä 23 hektarlı proyekt “Q-Park Qazan” dip atala. “Q-Park Qazan” Qazannan 25 kilometr yıraqlıqta, Qazan- Irınburg federal'' maşina yulı qırıyında Layış rayonında tözelä. Respublikanıñ iqtisat belgeçläre, Tatarstan xökümäte irland investorına ömetle, qurqınıçsız proyekt büläk itte dilär. Çönki urın bik uñışlı. İdel buyı töbägendä iñ zur säwdä mäydanı bulaçaq terminalğa aqça kertüçelär barsında çutlağannar, uylağannar bulsa kiräk. Qazan-Irınbur federal'' maşina yulınnan Mäskäwgä, Samarağa, Yekaterinburgqa, Tübän Novgorodqa, Ufağa yök maşinaları köne-töne tovar taşıy. Şunda uq “Qazan” aeroportı. 23 hektarlı “Q-Park Qazan” alış-bireş, saqlaw urını açılğaç tovar taşuçılar anıñ arqılı ütäçäk. 20-30 meñ kv.metrlı skladlarğa iäläşkän İdel buyı töbägendäge eşquarlar älegä gigant sanalaçaq logistik sklad terminalında başları äylänmäsä yarıy inde. “Q-Park Qazan” nı tözüçelär anda bulaçaq ofislarnıñ arenda bäyäsendä Mäskäwdäge bäyälär belän tiñlämäkçelär. Tatarstanda kilep tabış alırğa teläwçe “Quinn Group” İrlandiä şirkäteneñ Rusiädäge citäkçese Vladimir Sennikov Tatarstan citäkçelärenä Rusiädä, ayırım alğanda Tatarstanda mondıy proektqa berençe tapqır investor buluıbız di. Çit il investorına “Q-Park Qazan” säwdä mäydanın tözergä törek, Mäskäw, Qazan eşquarları bulışabız digännär. Älege proyektqa qatnaşı bulğan Qazan eşquarı Damir İsmägıylovqa şaltırattıq. Ul; “Bezneñ bu proyekt bik zur bit, mäydanı da, aqçası da. Qolaçlap beterä alırsız mikän!”- dide. Älegä başqa mäğlümätlär birergä waqıtı yuq ide. Röstäm İsxaqi
XS
SM
MD
LG