Accessibility links

шимбә, 3 декабрь 2016, Казан вакыты 12:51

Çallıda iñ yaxşı tatar yegeten sayladılar


Tatar yegete bulu öçen ni kiräk? Ul nindi sıyfatlarğa iä bulırğa tieş? Älege sorawlarğa cawapnı Çallı şähäreneñ “Nur” yäşlär üzäge ezläde. Çönki näq menä Çallıda “Tatar yegete” bäygeseneñ final öleşe uzdı. İñ yaxşı “Tatar yegete”n saylaw bäygese Çallı şähärendä 2004 yılda uq ütkärelgän. Soñınnan bu bäyge Bötendönya Tatar başqarma kongressı yärdäme belän Qazanda da uzdırıla başladı.

“Tatar yegete” bäygesen uzdıru tatar yäşläre arasında matur milli traditsiägä äwerelde. Oyıştıruçılar süzlärenä qarağanda, biredä qatnaşırğa teläwçelärneñ sanı yıldan-yıl arta. Bıyıl bäygedä 11 uqu yortı studentları köç sınaşqan. 2005 yıldan “Tatar yegete” bäygese töbäqara däräcäsendä uza.Anda Tübän Novgorod şähärennän dä qatnaşuçı yegetlär bulğan. Ni öçen kiräk soñ tatar yegetlärenä älege bäyge? Närsä birä ul alarğa? Bu xaqta “Nur” üzägeneñ yäşlär belän eşläw buyınça belgeç Älfinä Kaşapova söyli

“Tatar yegete” bäygesen uzdırunıñ maqsatları: yäşlärne tatar tarixı, mädäniäte belän tanıştıru, alarda tatar xalqına xas bulğan iñ yaxşı sıyfatlar tärbiäläw häm yegetlärdä tatar xalqına xas ğorurlıq xise tärbiäläw tora.

Qızlar yörägen yandıra alırlıq yeget nindi bula?

Yegetläreneñ niçek saylap alalar soñ? Älfinä Kaşapova däwam itä

Bäygeneñ berençe turı yuğarı häm urta belem birü yortlarında uzdırıla, ber-ike student yarımfinalğa çığa. Bıyıl yarımfinalğa 14 yeget çıqtı. Jyuri tarafınnan 6 yeget finalğa saylap alındı. Final Sara Sadıyqova isemendäge konsertlar zalında uzdı. Döres itep tatarça söyläşülären, etika normaların belülären, hönärlären kürsätergä tieş ide yegetlär.

Yegetlärne saylaw monıñ belän genä çiklänmi äle. İñ yaxşı tatar yegete isemen alu ciñel genä birelmi, di Älfinä Kaşapova. Alar öçen törle nominatsiälär qaralğan. Üzläre belän tanıştıru, sänğät'le itep şığır söyläw häm cır başqaru belän genä çiklänmi yegetlär. Alar ber-berse belän qul köräşterä, xätta at ta cigep kürsätä. Yeget keşegä citmeş törle hönär dä az digän tatar xalıq mäqälen yegetlär şulay isbatlap kürsätte.

Bıyılğı bäygedä qızu köräştän soñ tatar yegete isemenä Lenar Ğafiätullin layıq bulğan. Xäzer ul töbäqara “Tatar yegete” bäygesendä qatnaşırğa äzerlänä. Oyıştıruçılarnıñ süzlärenä qarağanda, bıyıl bäygedä Rusiäneñ başqa töbäklärendä yäşäwçe tatar yegetläre dä qatnaşır dip kötelä.

Güzäl Zıyätdinova

XS
SM
MD
LG