Accessibility links

пәнҗешәмбе, 8 декабрь 2016, Казан вакыты 12:48

Putin wäkile mullalarğa grant birmäde


Tatarstan gel paçetta ul. Şulay bulmasa, kön aralaş berär çit il türäçe, ä inde köndä berär Rusiäneke kilep tormas ide. Paçetın da anıñ bik matur añlatalar. Respublikada millätara tigezlek çäçäk ata, iqtisadi görläp bulmasa da, barıber alğa bara, Mäskäw qaznasına aqça ağa tora. Yaratalar şunıñ öçen. Menä pänceşämbedä üzeneñ mäxäbbäten wä xörmäten kürsätergä Rusiä prezidentınıñ İdel buyı federal' okrugı citäkçese Aleksandr Konovalov kilde. Sağındırğan qunaq tügel anısı. Läkin, kilgäç matur itep qarşı aldılar. Niçek kenä bulmasın, Tatarstan öçen dä ul türä wazifaların başqara bit. Bu kilüendä Konovalov Aleksandr İdel buyı federal' okrıgındağı din ähellären dä Qazanğa cıydı.

Çınlap ta, Tatarstan gel paçetta, haman maqtıylar. Näq cırdağıça. Läkin ul maqtaw buşqa ğına birelmi bit. Maqtaw artında tınğısız eş, bäyäläp betergesez xezmät yata. Däwlätneke wä türälärneke genä tügel. Ğadi xalıq öleşe dä monda bixisap. Menä, qayber köçlär torıp-torıp, Tatarstanda meñnän artıq mäçet dip, çirkäwlär 200 tiräse genä dip, yänäse tigezlek yuq digängä ımlap quyalar. Läkin, härkem öçen açıq, bu mäçet il ağaları kebek babaylarıbız. Ğadi xalıq wä yumart xäyriäçelär aqçasına tözelä. Tözelä mäçetlär şulay, açıla mädräsälär. Ber Tatarstanda ğına tügel. Ä böten İdel-Uralda şulay. Tatar iman yañartqan kebek, mäçet tözep quya xäzer. Mulla- möftilär tartqalaşı da xäzer ällä ni zur toyılmıy. Qazan inde ikençe yıl Ufadağı wä Mäskäwdäge möftilärne üzara duslaştıru belän şöğellänä. Häm bit kilep çığa bu. İnde, Qazandağı tantanalarda möfti Rawil Ğäynetdinne dä, möfti Tälğät Tacetdinnı dä kürep bula. Urtalarında Tatarstan möftie basıp tora. Menä berlek, tatulıq şıtımnarı bula başlağaç, däwlät tä yoqlap yatmıy. Rusiä prezidentınıñ İdel buyı federal okrugındagı wäkile Konovalov Aleksandr da, pänceşämbedä Tatarstannıñ wä kürşe tirädäge möfti häm mullaları belän oçraştı. Qazanda. Bu oçraşuda Tatarstan prezidentı Mintimer Şäymiev tä qatnaştı. Elek, qayber çığanaqlar , Tatarstan prezidentı, Putinnıñ İdel buyındağı wäkile Sergey Kirienkonı bik önäp betermi ide dilär. Ul bit, tege Tatarstan qanunnarın Rusiänekenä täñgälläşterüne taläp itep kilde. Xäzer, yaña wäkil belän Mintimer Şäripoviçnıñ mönäsäbätläre äybätkä oşağan. Yuğiysä, din ähelläre belän oçraşuğa ğına prezident tiklem prezident waqıt äräm itep yörmäs ide. Niçek kenä bulmasın, bernindi şaw-şusız ğına uzdı bu oçraşu. Mädäniät ministrlığında.

Aldan xäbär itelgänçä, bu oçraşu waqıtında federal' okrug qarşındağı “Grajdanlıq cämğiäte institutın kiñäytü wäqıfı” tarafınnan un mullağa häm un şäkertkä grant birü mä’säläse dä qaralırğa tieş ide. Döresräge anıñ isemlege. Bu xaqta da Konovalov äytep uzğan, läkin cıyılışta grantlar birelmägän.

Oçraşu uzğannan soñ. Respublikanıñ räsmi xäbär agentlıqları qısqa ğına xäbärdä din wä däwlät oyışmalarınıñ üzara xezmättäşlege, ruxi yañarış, dinara tınıçlıq mäğärif häm din ähellären äzerläw mä’sälälären qaradılar dip xäbär itte.

Räfis Cämdixan

XS
SM
MD
LG