Accessibility links

пәнҗешәмбе, 8 декабрь 2016, Казан вакыты 11:03

Näbirä Ğimatdinovağa maqtawlı isem birelde


Şuşı könnärdä tanılğan yazuçı, cämäğät eşleklese “İdel” yäşlär jurnalınıñ baş möxärrire Näbirä Ğimatdinovağa xäzerge zaman tatar ädäbiäte häm sänğäte ölkäsendäge qazanışları öçen “Tatarstan respublikasınıñ atqazanğan sänğätkäre” digän maqtawlı isem birelde.

Näbirä Ğimatdinova Tatarstannıñ atqazanğan xezmätkäre, Yazuçılar berlegeneñ Fatix Xösni isemendäge ädäbi premiä lawreatı. Aqsubay yaqlarınıñ Qarasu awılı qızı. Anıñ Su xikäyäse, Ut kübäläge, Sixerçe, Küke tökerege, Kitäm dimä, Aq torna qarğışı kebek häm başqa küpsanlı äsärläre bar.

Anıñ här äsären uquçı kötep ala. Cıyentıqları basılıp çıqsa, alar bik tiz satılıp betä. Här äsäre yılnıñ iñ uqılışlı kitabı konkurslarında ciñü yaulıy. Anıñ äsärläre buyınça Ufada, Minzälädä, Qazanda teatrlar spektkallär quydı häm ul spektakl''lär äledä teatr säxnälärendä quyıla. Anıñ “Ut kübäläge” xikäyäse buyınça yazılğan pyesası da “Yaña tatar p''yesası” bäygesendä ciñü yauladı. Häm bu pyesa tizdän tatar teatr säxnäsendä quyılaçaq.

Anıñ “Kitäm dimä” digän äsäre buyınça Tatarstan televideniese 5 seriäle kinofilm töşerde. Respublikadağı yuğarı uqu yortlarındağı 20 student anıñ äsärlären öyränep diplom eşlären yazdı.

Näbirä Ğimatdinovanıñ bu könnärdä 50 yäşen tutırğan könnäre. Ämma ul äle haman yäş häm bik citdi, qızlar kebek. Anıñ äsärläre dä yäşlär arasında da, qartlar arasında da bik popular. Çönki anıñ äsärläre keşelekne borçığan Mäxäbbät, Tabiğät, häm keşelärneñ Äxlaq sıyfatların kürsätä torğan temalarğa yazılğan.

“Sixerçe ”äsärenä kilsäk, ul tabiğätkä ğaşıyq ber qıznıñ, häm şuşı ğaşıyqlığı arqasında sixerçe quşamatı alğan qız turında. Bu tema yäşlärgä yaqın, bügenge köndä bik küp keşelärne borçığan tema.

Näbirä Ğimatdinovanıñ ğailädä nindi keşe buluı turında bez anıñ tormış iptäşe “Mäğärif ” jurnalı baş möxärrire urınbasarı Rifqät Bikçurovtan soraştıq. Ul menä närsälär söyläde .

"Öydä ul balalarnı da üzeneñ tämle süze belän tärbiäli. Bik qayğırtuçan. Qayda ğına kitsä dä, ä soñğı yıllarda ul bik yış eş säfärlärendä bula, ul balalar turında härçaq şıltıratıp beleşep tora.”

Näbirä Ğimatdinova “Azatlıq” radiosı xäbärçesenä üzeneñ uy- xıyalları, teläkläre belän urtaqlaştı. Anı borçığan närsälär: niçek itep kübräk yäşlärne ädäbiätkä tartu häm yäşlärdä ädäbi telne üsterü:

“Yäşlek bit ul bergenä tapqır kilä . Bügenge köndä tumıyça qartayğan, yäşleklären zarlanıp ütkärüçe yäşlär bar. Bügenge yäşlärdä romantik rux yuq. Ni qızğanıç, Ämirxan Yenikilar , Ğarif Axunovlar tele betep bara. Ädäbi telneñ yuğarılığın “İdel” kütärergä tırışa”dip menä şundıy uylar belän yanıp yäşi ul.

Mälikä Basıyr

XS
SM
MD
LG