Accessibility links

шимбә, 3 декабрь 2016, Казан вакыты 18:46

Çallı trenerı nigä ülgän?


Rusiäneñ berençe ligasında uynawçı Çallı xokkey komandasınıñ baş trenerı Aleksandr Çernetsovnıñ üzençälekle häm serle ülemenä atnadan artıq waqıt ütte. Tıñlawçılarnıñ isenä töşeräm, Aleksandr Çernetsov 26 oktäber könne Mari İle respublikasınıñ Voljskiy şähäre kunakxanäsendä yaqtı dönyadan kitep bara. Çallı xokkey komandası biregä çirattağı uyınğa kilgän bula. Ülem säbäpläre buyınça tikşerü başlanğaç ta, Voljskiy şähäreneñ prokuror urınbasarı Natal'ya Anisimova "2 noyäbergä Çernetsovnıñ yaqtı dönyadan kitüenä açıqlıq keräçäk,"- dip beldergän ide. Menä 2 noyäber dä ütep kitte, 3 noyäber ütep bara, läkin baş trenernıñ ülem säbäpläre xaqında kisterep äytüçe älegä yuq. Bälki Mari İle häm Tatarstan tikşerüçeläre nindi dä bulsa dälilgä tuqtalğandır, läkin matbuğat çaraları, cämäğätçelek öçen Çallı xokkey komandası baş trenernıñ ülem säbäpläre bilgesez bulıp qala. "Azatlıq" xäbärçese Çallı prokuraturasınnan da, tikşerü bülegennän dä anıq cawap ala almadı. Barı tik, Çallı, Qazan, Voljskiy tikşerüçeläre eşne bergäläp alıp baruların, älegä nindi dä bulsa mäğlümat birä almawların äyttelär.

Bilgele bulğança, Aleksandr Çernetsovnı asılınıp ülgän kileş tabalar. Şunnan çığıp, qayber mäğlümat çaralarında, anıñ asılınıp ülüenä yärdäm itüçelär buluı ixtimal digän xäbärlär kürende. Çallı xokkey komandası prezidentı İğor Kryukov bu farazlarnı kire qaqtı häm, "100% ışanıç belän äytäm, älege oçraqta keşe üzenä- üze qul salğan,"- dip beldergän ide. Komanda prezidentı süzlärençä, Çernetsovnıñ üz-üzenä qul saluında ğailä problemaları säbäp bula almıy, böten eş anıñ professional' eşçänlegenä qaytıp qalırğa mömkin. Qazan şähärennän Çallığa eşkä kilüe şaqtıy çetrekle bula. Şul uq waqıtta Kryukov äfände Çernetsovqa törle yanawlar buluın, läkin ul yanawlarnıñ xuliganlıq däräcäsendä genä ikänen assızıqladı. Tuğız yıl "Aq bars" komandasında trener bulğan Aleksandr Çernetsov Çallı professional' xokeyena nigez salğan keşe ide. Biredä ul ber yıldan az ğına kübräk eşlärgä ölgerde. Waqıt uza, älege şäxesneñ ülem säbäplärendä cawaplarğa qarağanda sorawlar kübäyä kebek.

Çallı, Ğafiulla Ğaziz

XS
SM
MD
LG