Accessibility links

пәнҗешәмбе, 8 декабрь 2016, Казан вакыты 17:25

Sember möxtäriäte eş yünäleşlären bilgeläde


Yül ayında uzğan qorıltayda saylanğan Başqarma komitetnıñ berençe utırışı buldı. Ustav buyınça ul yılına ike märtäbä genä cıyıla, çönki barlıq rayonnar wäkillären dä yış cıyu zur çığımnar taläp itä.

Utırış ğädätkä kergän räxmät xatları tapşıru yolasınnan başlandı. Yaña citäkçelekneñ iñ yaratqan eş ısulı inde monısı. Döres, yuğarı dairälärdän dä andıy därtländerü çaraları yışaydı. Qanunnar çığaru cıyılışı konsul''tantı Gölfinur Çulakovağa Federal'' Şura citäkçese Sergey Mironovnıñ räxmät xatı, Dimitrovgrad avtonomiäse citäkçese Rival'' İdrisovqa ölkä başlığı Morozovnıñ “İman häm yaxşı ğamälläre öçen” (Za veru i dobrodetel'') digän maqtaw bilgese, yazuçı Lena Sadıykovağa Mintimer Şäymiewneñ Räxmät xatı. Şuşı uñaydan Tatarstan xakimiäteneñ ölkä tatarlarına oluğ yärdäme dä assızıqlandı.

Artaban Başqarma komitetqa yaña biş äğza qabul itelde. Kooptatsiä, dilär inde anısın. Eş yünäleşläre buyınça daimi komissiälär tözelde: Mäğärif, Mädäniät, Sport, Mäğlümat çaraları, Din, Ğailä häm xatın-qızlar arasında eş…

Çığışlarnıñ töp mäğnäse – törle tarmaqlar buyınça çişeleş taläp itkän mäs''älälär. Kitap kibetlärendä tatarça kitaplarnı da buldıru, ziratlarnı tärtiptä totu öçen daimi ömälär oyıştıru, awıllarda üzeşçän sänğät''ne canlandıru, soñğı yıllarda sabantuylarnıñ här awılda uzdırılmawı, rayon buyınça ber genä milli bäyräm belän çiklänü kebek küreneşne tuqtatu…

Ölkä üzägeneñ Zöyaaryağı avtnomiäse räise Kotdus Möxämmätşin Yaña şähär ürnägendä üz rayonında da mäktäp açu mömkinlegenä tuqtaldı. 700 urınlı 7-nçe mäktäptä nibarı 200 bala uqi, rayon başlığı Başkarev anda tatar balaların tuplawğa qarşı tügel, dide ul. Läkin şul uq rayonda uquçılarınıñ 54 protsentı – tatar, 32 protsentı çuaş bulğan 55-mäktäpne tatar-çuaş mäktäbe buldıruğa qarşı ikän Kotdus äfände. Çönki, dide ul, urıs balaların da ixtiram itärgä kiräk. Yuğisä, şuşı uq mäktäptä uqırğa tieş baytaq balalar küptän tügel safqa basqan, zamança cihazlandırılğan kürşe 82-mäktäpkä yörüne qulay kürälär. Anda 4 paral''lel'' sıynıfta uquçı ballarnıñ da 28 protsentı – tatar balaları. Şuşı uq 55-mäktäpne taşlap kitüçelär dä küp anda. Ä 7-mäktäp tiräsendä tatar uqmaşıp yäşämi, häm balalarnı tuplaw ciñel bulmas. “Tuğan tel” wäkilläre isä qatnaş millätle mäktäptä milli atmosfera tudıru mömkin tügellegenä dä iğtibar yünälttelär.

Çığışlar küp buldı. Barısı da, diärlek, ike oluğ mäsälägä tuqtaldılar: mäktäplärdä can başına aqça birü turındağı qanun häm “Çişmä” tapşıruın yabu – iñ awırtqanı. Ölkä Qanunnar çığaru cıyılışı Däwlät Dumasına qanunnarnı üzgärtü buyınça täqdimnär äzerli ikän. Gölfinur Çulakova şularnıñ proyektı östendä eşli. Bu ike mäs''älä buyınça da täqdimnär bar. Alar ütemleräk bulsın öçen, xalıq ta üz süzen äytsen ide. “Tamçı da taş tişä” digän xalıq mäqäle bar. Bu mäs''älälär buyınça Prezident Putin isemenä xat yazıp, imzalar cıyu da qomaçawlamas ide, dide Gölfinur xanım. Şundıy qarar qabul itelde dä.

Şuşı qararnı ütäw buyınça eş başlandı da kebek inde. Härxäldä 2 distä çaması studentlar cıyılışında imzalar cıyıldı. Bu cıyılışnı Avtonomiäneñ yäşlär bülekçäse citäkçese Rinat Sadıykov häm Ölkä Qanunnar çığaru cıyılışı qarşındağı Yäşlär İctimaği palatasınıñ Mäğärif häm xezmät komitetı liderı El''wira Mansurova alıp bardılar. Utırışnıñ maqsatı – Gölsinä Gerasimova citäkçelegendä räsmi Tatar mädäni üzäge barlıqqa barlıqqa kilgännän soñ tarqalğan Tatar yäşläre oyışmasın torğızu.

Älege cıyılışta, nigezdä, Politexnika universitetı studentları ğına qatnaştı. Alda barlıq yuğarı uqu yortlarında belem aluçı tatar yäşlären dä tuplaw burıçı tora, didelär. Xäyerlegä bulsın.

Ayrat İbrahim, Sember

XS
SM
MD
LG