Accessibility links

шимбә, 10 декабрь 2016, Казан вакыты 08:03

Rusiädä berdämlek könen härkem üzençä añlıy


Bu könnärdä iñ aktual' häm qatlawlı tema bäyrämnärneñ mäğnäse tora. 4 noyäberdä Rusiä xalıqlarınıñ berdämlege köne, 6 noyäberdä Tatarstan konstitutsiäse köne, 7 noyäber – Böyek oktäber sotsialistik inqilabı, yañaça äytkändä tatulıq häm rizalaşu köne. Ğadi xalıqnı ğına tügel, xätta säyäsätçelär häm jurnalistlarnıñ da şuşı bäyrämnärneñ mäğnäsen döres añlap beterä almıylar.

Älege bäyrämnärneñ säyäsi eçtälegen yañğıratqan räsmi çaralar bulsa da, kiñ cämäğätçelek 4 noyäber belän 7 noyäber bäyrämnäreneñ ayırmasın belep betermi. Yaña ğasır telekanalınıñ yäkşämbe 7 kön tapşıruın alıp baruçı Mixail Lyubimov 4 noyäber bäyräme uñayınnan uzdırılğan xalıq soraştıruın täqdim itkändä sorawnı bolayraq quydı.

“Älege bäyrämneñ mäğnäse häm xalıq fikerençä tatulıq häm rizalaşu närsäne añlata?”

Ä bit 4 noyäber bäyrämeneñ mäğnäse başqaça, ul xalıqlar berdämlege köne bulsa, ä bit bu tatulıq häm rizalaşu köne 4се tügel, ä 7 elekkeçä äytsäk Böyek oktäber sotsialistik inqilabı köne ul. Şulay uq ekranda 4 noyäberdä Bauman uramında Berdäm Rusiä firqäse ütkärgän çarağa kilüçelärneñ cawapları da yañğıratıldı. Cawaplarğa qarağanda, beräwlär 4 noyäberne Qazan izge anaqay bäyräme dip sanıy, ikençelär elekke oktäber inqilabın iskä ala, ä küplär bolay ğına uramda yal itärgä çıqqannarın belderde.

Şul uq telekanalnıñ mäğlümatlarına qarağanda soraştırılğan keşelärneñ 3 protsentı ğına 4 noyäberneñ Minin, Pojarskiy digän keşelär 4 ğasır elek opolçenie oyıştırıp Mäskäwgä baruların iskä ala.

Bu könneñ mäğnäsen küpmillätle ğailälärneñ tigez tatu toruı belän kürsätü dä buldı. Tatarstannıñ qayber rayonnarında häm awıllarında tatar, rus, udmurt, çuaş millätlärneñ ber ğailä tözep ğömer itülärenä bağışlanğan reportajlar ekranda kürsätelde.

Şimbä könne 4 noyäberdä Qazannıñ Säydäşev isemendäge zur konsertlar zalında Rusiä xalıqlar berdämlege köne uñayınnan Bez berdäm şiğare astında tamaşa ütte. Däwlät Şurası räise Färit Möxämmätşin cıyıluçılarnı berdämlek köne belän täbrik itte. Qazan säyäsätçeläre häm cämäğätçeläre öçen bu kön törle millät wäkillärneñ berdäm, tatu yäşäwe fikere belän bäyle. Säxnädä tatar, rus, çuaş, mari, udmurt xalıqlarnıñ sänğäte kürsätelde. Bez berdäm şiğare astında uzğan konserttan soñ Färit Möxämmätşin jurnalistlarğa här urında, här ğailädä ir belän xatın, balalar, tuğannar berdäm tatu yäşäwne añlata dip bäyrämgä ğailä berdämlege tösmeren dä birde.

Şul uq waqıtta Qazanda Blagoveşçenie soborınnan Xrestovozdvijenskiy çirkäwenä täre yöreşe ütte. Qazan izge ana ikonosı tabılu könneñ iskä alıp, pravaslau dinen totuçılar şuşı ikonağa tabınıp, tön buyı ğibädät qılıp ütkärdelär.

Qısqası, bäyräm berläşterä, läkin nindi bäyräm ikänen härkem üzençä añlıy häm üzençä bäyräm itä.

Gölnaz Şäyxetdin

XS
SM
MD
LG