Accessibility links

шимбә, 10 декабрь 2016, Казан вакыты 23:45

İjaw mäktäbenä Rawil Gubaev iseme birelde


Şähärdä unınçı mäktäpne elek—elektän Gubaev mäktäbe dip yörtälär. Rawil Minneäxmät ulı Gubaev unınçı mäktäpne tözep, çirek ğasır anı citäkläde. Layıqlı yalğa çıqqaç ta Rawil Gubaev mäktäptä sotsial' pedagog bulıp xezmät itüen däwam itte. Mäktäp üzeneñ tırış uquçıları, tınlı instrumentlar orkestrı, sport ölkäsendä uñışları belän dan qazandı. İjawda berençelärdän bulıp unınçı mäktäp tatar sıynıfların tuplıy başladı, bügen dä bu eş anda ezlekle räweştä alıp barıla.

Rawil Gubaev inde berniçä yıl elek bezneñ aradan kitte, ämma anıñ iseme xalıq telennän töşmi. Mäktäpneñ stenasına elekkege direktornıñ isemen mäñgeläşterü yözennän memorial' taqta berketelde, mäktäp muzeyında anıñ eşçänlege xaqında ekspozitsiä bar, ä xäzer unınçı mäktäpkä şähär administratsiäse qararı nigezendä räsmi räweştä Rawil' Gubaev iseme birelde. Bu uñaydan anda miting uzdı. Uqıtuçılar, uquçılar, uqu yortınıñ bügenge citäkçeläre, ata—analar, Rawil Ğubayıvnıñ xezmättäşläre, dusları, tuğannarı mitingta qatnaştılar. Süz Rawil Gubaev belän yäştän tanışıp, bergä uqığan häm İjaw şähäreneñ 20 tatar mäktäbendä bergä xezmät yulın başlağan Ädip Kärimovqa.

Rawil Gubaev isemen mäktäpkä birü eşen anıñ bügenge citäkçese Elena Razvalinova häm bu mäktäpne tämamlağan, bügen şähär dumasında häm respublika Däwlät Sovetında deputatlar Nail Möxämmätcanov belän Yuri Tyurin da zur tırışlıq kürsättelär. Deputatlarnıñ yärdämçese Foat Äbübäkerov unınçı mäktäpneñ direktorı turında xatiräläre belän urtaqlaştı.

Foat Äbübäkerovnıñ ike balası da şuşı mäktäpne tämamlağan, üze dä deputat bulıp eşlägän yıllarında biredä saylawçılarnı qabul itkän, mäktäp xezmätkärläre, ayıruça direktor, anıñ eşendä yärdäm itkän.

Unınçı mäktäptä tarix uqıtuçısı bulıp eşlägän Gölfidä Märdänova küñelendä dä Rawil Gubaev turında iñ yaqtı xatirälär saqlana.

Mäktäpne tämamlap, yuğarı belem alıp, biregä eşkä qaytuçılar da baytaq ikän. Alarnıñ berse — Kadriä Asıylmardanova. Ul Rawil Minneäxmät ulına bik räxmätle, anıñ başlanğıçların däwam itüe belän şat.

Bügenge uquçılar da elekkege direktor turında xäbärdar. Anıñ isemen yörtüçe mäktäptä uquları belän ğorurlanalar.

İjaw şähärendä mäktäpne citälüçeneñ isemen birü — berençe oçraq. Ä inde millättäşebez iseme birelüe — ayıruça şatlıqlı waqiğa.

XS
SM
MD
LG