Accessibility links

шимбә, 3 декабрь 2016, Казан вакыты 14:45

Qırğızstandağı xakimiät köräşe yaña konstitutsiä äzerläw tiräsendä bara


Qırğız prezidentı Qormanbäk Baqiev oppozitsiäne ildäge xakimiätne yolqıp alırğa tırışuda ğäyepläde. Berük waqıtta ul üzenä qarşı çıqqan köçlärne, Qırğızstanda nindi xakimiät tören urnaştıru xaqında kiçekmästän kiñäşläşülär başlarğa da öndäde. Parlamenttağı ber törkem deputat sişämbegä qarşı töndä ilneñ yaña konstitutsiäsen äzerläw öçen maxsus täşkiläwi mäcles qorunı yaqlap çıqqan ide. Alar prezidentnıñ xäzerge wäkalätlären alıp, parlamentnı köçäytüne alğa sörä.

Qırğızstandağı xakimiät köräşe şulay itep prezident belän parlamentnıñ aña qarşı tora başlağan ber öleşe arasındağı qarşılıqqa äylänä bara. Häm bu qarşılıq inde sişämbedä uram çualışları tösen dä aldı - Bişkäk üzägendäge mäydannarnıñ bersendä, tuqtawsız cıyın ütkärgän oppozitsiä tarafdarları prezident yaqlı köçlär belän bärgäläşep aldı. Bu tärtipsezleklär militsiä yardämendä genä tuqtatıldı.

Sişämbegä qarşı töndä ber törkem deputat parlament binasına cıyılıp, anda utırış başlarğa tırışıp qarağan ide. Ämma monıñ öçen tieşle quorum bulmaw säbäple - kiräk 51 deputat urınına 45-e genä kilde - utırış açıla almadı. Anda oppozitsiä deputatları Qırğızstan xakimiätendäge wäkalätlär bizmänen üzlärençä kamilläşterü öçen il konstitutsiäsenä üzgäreşlär kertergä telägän ide. Monıñ bar parlament tarafınnan yaqlana aluı şikle bulğaç, alar Qırğızstannıñ yaña konstitutsiäsen äzerläw öçen maxsus täşkiläwi mäcles qorunı yaqlap çıqtı.

Mäğlümät çaraları, sişämbegä şul yaña ölgene yaqlap parlamenttağı 71 deputatnıñ 39-ı imza quydı, dip xäbär itte.

Oppozitsiädäge deputatlarnıñ üzenä qarşı yünälderelgän şuşı tırışlıqların prezident Qormanbäk Baqiev ildäge xakimiätne yolqıp alu omtılışı dip bäyäläde. Häm ägär dä alar säyäsi wäzğiätne totrıqsızlandıru eşen däwam itsä, ğämäldäge konstitutsiä aña parlamentnı taratu xoquqın birä, dip kisätte.

Baqiev süzlärençä, Qırğızstan xalqınıñ zur öleşe anıñ yağında:

"Xalıq bezneñ eşne naçar bäyälämi. Işanam ki, keşelär prezident Baqievne häm premyer-ministr Feliks Qulovnı berqayçanda bärep töşerergä telämäyäçäk", di Qırğızstannıñ xäzerge başlığı Qormanbäk Baqiev.

Prezident şulay uq qarşı yaqnı kiçekmästän söyläşülär östäle tiräsenä cıyılıp, konstitutsiägä üzgäreşlär kertü mäs''äläsendä urtaq ber fikergä kilügä öndi. Düşämbedä ul üz täqdimnären iğlan itkän ide, anda Qırğızstanda prezident häm parlamentnıñ urtaq ber xakimiäten qoru qarala. Yäğni parlamentqa küpmeder wäkalätlär birelä alsa da, xökümät xäzerge kebek nigezdä prezident qaramağında qalaçaq.

Oppozitsiä isä premyer-ministrnı ğına tügel, bar ministrlarnı da turıdan-turı parlamentqa cawaplı itmäkçe.

Kärim Kamal
XS
SM
MD
LG