Accessibility links

шимбә, 10 декабрь 2016, Казан вакыты 13:49

Yaña yılğa yaña polis belän


İnde mäğlüm bulğança, kiläse yılnıñ berençe ğinwarına qädär yaña iminlek polisın alıp quyarğa kiräk. Çönki yaña yıldan iskeläre ğämäldän çığarılaçaq. Polisnıñ ähämiäte şunda - annan başqa däwalanu mömkin tügel.

Döres, aqça tüläp däwalanasıñ ikän, polisnı soramaslar anısı. Aşığıç yärdämne kürsätkändä dä polisnıñ buluı şart tügel. Ämma inde däwlät yärdämenä kilgändä, iminlek polisınnan başqa däwalanu mömkin tügel. Şuña kürä yaña yılğa qädär iskelären tapşırıp, yäşel töstäge yaña polisnı alıp quyu xäyerleräk. Bu xaqta bigräk tä respublikadağı iminlät kompaniäläre kisätep tora. Şulay da Tatarstannıñ mäcbüri iminlät waqife citäkçese urınbasarı Marina Möxämmädiewa äytüençä, iske polis 2007 yıldan da irtäräk ğämäldän çıqmayaçaq. Döres, iskelären birü inde noyäber başınnan tuqtatılğan anısı.

Xäyer, yaña polisnı alırğa aşıqtırğan iminlät kompaniä wäkilläre üz faydası öçen tırışa. Mäcbüri iminlät sisteması däwlättän här keşegä dä aqça bülüne küzdä tota. Şunlıqtan iminlek kompaniäläre arasında zur köndäşlek bara. Şulay itep, straxovanie yäğni xalıqnı iminiätläşterü eşe bik qızu bara Tatarstanda.

Elek isä Rusiäneñ başqa töbäklärennän ayırmalı bularaq, Tatarstanda iminiätläşterü belän ozaq yıllar däwamında xastaxanä kassaları şöğellände. Barı tik uzğan yılnıñ axırında respublikada mäcbüri iminlek waqife buldırıldı. Yaña sistema barlıqqa kilgäç, polislarnı birü tärtipläre dä üzgärde. Xäzer eşläwçelär anı toraq urını buyınça tügel, ä eştän alırğa tieş. Monıñ öçen eş birüçe ayırım ber iminlät kompaniäse belän kileşü tözi. Alar isä Tatarstanda berniçä - “Aq Bars Med”, “Spasenie”, “Çulpan-Med” cämğiätläre häm başqalar.

Ä eşlämäwçelär, pensionerlar, balalarnı iminiätläşterü mäs’äläsendä eşlär alay kisken tormıy. Çönki alar belän barı tik “Aq Bars Med” kompaniäsenä birelgän. Yäğni Tatarstan xalqınıñ 2,5mln. keşese polisnı “Aq Bars Med”tan alaçaq. Alay ğına tügel, eşçe xalıqnıñ da yartısına polisnı “Aq Bars Med” iminlät kompaniäse birä.

Belgeçlär äytüençä, eşläwçelärgä polis eştän birelsä dä, eşennän kitkän oçraqta polisnı qaytaru sorala, yañasın aña eştä birergä tieşlär. Eşlämäwçelär yaña polisnı mäşğül'lek xezmätendä, pensionerlar pensiäläre belän bergä poçta bülegendä, ä balalar isä baqça yäki mäktäplärdän alırğa tieş.

Bügen Tatarstanda 3mlnnan artıq keşe yaña polisnı alıp quyğan inde. Yäğni respublika xalqınıñ yartısınnan kübeseneñ kiläse yılda däwalanırğa tulı xoquqı bar. Yaña polisnıñ üzençälege tağın şunda - keşe meditsina yärdämennän qänäğät bulmağan oçraqta, ul üz däğwäların iminlek kompaniäsenä belderä ala.

Al'bina Zäynulla

XS
SM
MD
LG