Accessibility links

чәршәмбе, 7 декабрь 2016, Казан вакыты 23:15

Kosaçev: Kongress saylawlarınnan soñ AQŞnıñ Rusiä säyäsäte bik üzgärmäs


7 Noyäber Quşma Ştatlarda Kongress saylawları. Demokratlar uñışqa ireşkän oçraqta, Quşma Ştatlarnıñ Rusiägä qarata säyäsäte üzgärerme? Rusiä Dumasınıñ xalıqara mönäsäbätlär komitetı räise Konstantin Kosaçev düşämbedä Mayak radiosına bu xaqta üz fikerlären äytte.

Bezneñ öçen kem yaxşıraq - respublikannarmı, demokratlarmı, digän sorawğa elekke sovet citäkçeläre dä xäzerge Rusiänekeläre dä – respublikannar dip kilde. Konstantin Kosaçev süzlärenä qarağanda, bu qaraş äle dä köçendä. Demokratlar ğädättä keşe xoquqları, demokratiä mäsälälären kütärergä yarata, Kongressta küpçelekkä ireşsälär, alar Putin xakimiätenä östämä mäşäqät tudıra ala:

"Demokratlar, bezneñ öçen uñaysız bulğan keşe xoquqları, tanılmağan töbäklär häm başqa şundıy mäsälälärgä, respublikannarğa qarağanda kübräk basım yasıy."

Berük waqıtta şunı da tanırğa kiräk, Rusiä xäzer köçäyde, di Kosaçev. İqtisadi yaqtan da, säyäsi yaqtan da. 90nçı yıllar başında Rusiäneñ "yäş demokratları" amerikannarnıñ awızına qarap torğan bulsa, amerikannar alarğa östän qarağan bulsa, xäzer xakimiätkä kem genä kilmäsen, respublikannarmı, demokartlarmı, alar Rusiä belän alay söyläşä almıyaçaq.

"Rusiä belän normal, konstruktiv mönäsäbätlär buldırmıy torıp, amerikannar üzläreneñ möxim mäsälälären xäl itä almayaçaq – terrorğa qarşı köräş, küpläp üterü qoralların çikläw, bäxäsle töbäklär mäsäläsen."

Şul säbäple, Kosaçev fikerençä, Kongressqa demokratlar kilsä dä, Quşma Ştatlarnıñ Rusiägä qarata säyäsäte ällä ni üzgärmiäçäk. İxtimal, nindider simvolik üzgäreşlär bulır, äytik, Dönya Säwdä Oyışmasına kerü turında küpmeder waqıtqa onıtıp torırğa turı kiler, läkin, döresen äytkändä, Rusiä anda ällä ni aşqınmıy da, di Kosaçev.

Şulay da, Kongressnıñ kemneñ qulında buluı Rusiä öçen barıber meni, digän sorawğa, Kosaçev, barıber tügel di:

"Prezident belän Kongress arasında konflikt xaläte bulsa, bu Rusiä öçen, alarnıñ tatu yäşäwenä qarağanda küpkä yaxşıraq."

Berençe qaraşqa bu säyer fikeren Kosaçev şulay añlata: konflikt tänqitçän qaraş tudıra. Xäzer Bush administratsiäse üzen dönya üzäge dip sanıy häm tışqı säyäsättä üz beldege belän xäräkät itä. Ägär Kongressta oppozitsiä utırsa, Bushqa üz adımnarın sanabraq atlarğa turı kiläçäk.

Ğadi wä xaqlı fiker. Tik menä Kosaçev äfände Quşma Ştatlardan taläp itkän bu xakimiätlär büleneşe, Rusiäneñ üzendä niçegräk ikän? Äñgämäne alıp baruçı Mayak jurnalistı aña bu sorawnı birep azaplanmadı.

Ali Ğilmi
XS
SM
MD
LG