Accessibility links

җомга, 9 декабрь 2016, Казан вакыты 14:48

Açıq mikrofon: araqı küpme torırğa tieş?


Rusiä xökümäte yalğan araqı belän nıqlap köräşergä cıyına. Bu könnärdä finans ministrlığı xezmätkärläre araqığa minimal' bäyäne bilgeläw turında qarar äzerli. Anıñ bäyäse 70 sumnan da kim bulmayaçaq. Araqını kimräk bäyägä satuçılar isä alkogol'ne satu litsenziäsennän mäxrüm qalaçaq. Xalıq fikerençä, araqı iñ kim digändä küpme torırğa tieş? Bügenge “Açıq mikrofon” säxifäsendä bez qazanlılardan şul xaqta soraşırğa buldıq.

- Minemçä, şul 50 sum tiräse bulsa yarıy. Çönki keşe arzan dip törle şaqşı äyberlär eçä. Şunıñ öçen sıyfatlı araqınıñ bäyäsen töşersennär ide.

- Niçek bar şulay qalsın, normal' bäyä.

- Döresen genä äytkändä, ğomumän spirtlı eçemleklärne satmasalar yaxşıraq bulır ide. Çönki näq menä şuşı araqı arqasında küp kenä ğailälär tarqala. Ä inde bäyäsenä kilgändä, minem ul turıda uylağanım da yuq. Anıñ belän qızıqsınmıym. Niçä sum bulırğa tieş dip tä äytä almıym, çönki bügenge köndä anıñ niçä sum torğanın da belmim.

- Niqädär arzanraq bulsa, şulqädär yaxşıraq. Çönki kilde-kitte äyberlär eçep xalıq ağulanmas ide. Ä sıyfatlı araqı eçär ide.

- Min ğomumän araqığa qarşı, araqı eçü yaxşığa kitermi. Anı eçärgä kiräkmi.

- sıyfatına qarap araqı törle bäyädä bulırğa mömkin. Urtaça 50-60 sum bulsa şulay yarıy.

- Araqınıñ bäyäsen kütärergä sayın anıñ belän ağulanuçılar sanı arta. Bäyäne arzanraq quyıp, yäğni eçkeçelärgä alırlıq bäyä bulsa yarıy. Niqädär arzanraq bulsa, şu qädär yaxşıraq.

Gölnaz Şäyxetdin

XS
SM
MD
LG