Accessibility links

дүшәмбе, 5 декабрь 2016, Казан вакыты 23:49

Röstäm Miñnexanov KamAZda çülne yawlıy


Respublika citäkçeläreneñ eşläre tığız äle bu aralarda. Mintimer Şäymiev qanunnar imzalıy, törle çaralarda qatnaşa. Färit Möxämmätşin isä Qıtayğa kitep bardı. Anda ul Rusiä oyıştırğan kürgäzmä eşendä qatnaşuçı Tatarstan delegatsiäsen citäkli. Ä menä respublikanıñ premyer-ministrı isä bu yallarnı çüllärendä ütkärde. Anda ul Desert Challenge ralliında qatnaşa. Bilgele bulğança, Tatarstannıñ premyer-ministrı Röstäm Miñnexanov maşinalar, alarda yarışularğa bitaraf tügel. Tatarstanda ütkän timer atlarnıñ çabışında da yış qatnaşa ul. Çüllärdägesen dä yat itmi. Menä bu yulı da kemnärder salqın Qazanda bäyräm, yal itkän arada sport masterı Röstäm Miñnexanov qızu, qoyaşlı Berläşkän Ğäräp Ämirleklärenä kitte. Desert Challenge yarışı näq menä şuşı ildä uzdırıla. Äytergä kiräk, älege bäyge avtoçabışçılarda sezonnıñ iñ töp bäygese Dakar ralliına äzerlekneñ soñğı etabı dip sanala. Dakar isä kiläse yılnıñ başında, ğinwar ayında Afrika çüllärendä uzaçaq.

Läkin Ğäräp Ämirlekläre çüllärendäge inde 16 märtäbä ütä torğan uzışlar da ber dä ciñellärdän tügel. Berniçä kön däwam itkän älege bäygedä sportçılarğa 2 meñnän artıq km yul ütärgä kiräk. Bäygedä mototsikllarda, ciñel häm yök maşinalarda çabışalar. Tatarstanlılar Desert Challenge da KamAZ maşinalarında qatnaşa. Häm şaqtıy uñışlı ğına. 1999 yıldan başlap alar inde 7 märtäbä bu bäygeneñ ciñüçeläre buldı. Yäğni, qatnaşa başlağannan birle alar äle ber märtäbä dä ciñüne üz qullarınnan ıçqındırğannarı yuq. Bıyıl da Tatarstan komandası ciñügä ömetlänä. Uzışlar 5 noyäber könne Abu-Dabi şähärendä başlanıp kitte. Alar 10 noyäbergä qädär däwam itä. Sportçılarğa bu yulı 2 500 km yaqın yul ütärgä turı kiläçäk. Şularnıñ 900 kmdan artığı – maxsus, ayıruça awır ütä torğan urınnar, dip sanala. Uzışlarda 46 qatnaşuçı terkälgän.

Respublikadan uzışlarda KamAZ maşinalarında 2 törkem qatnaşa. Şularnıñ berse yörtüçe Röstäm Miñnexanov, şturman Aydar Belyaev, texnik Vladimir Çaginnan tora. Alar 244 nomerlı maşinada çığış yasıy. İkençe komandağa İlgizär Mardeev, Andrey Mokeev hem Sergey Reşetnikov kergän. Alar ikese dä KamAZ-Master komandasına kerä. Monnan tış rallida Rusiädän tağın ber komanda qatnaşa. Mäskäw-ZİL törkeme. Xäyer, belgeçlär fikerençä, Desert Challenge da tatarstanlılarğa barı tik ber genä komanda köndäş itä alaçaq. Ul da bulsa Mersedes maşinasında çığış yasawçı Britaniä wäkile citäklägän törkem.

Bıyılğı rallida da tatarstanlılar ciñüçe bulıp qala alırmı, 4 märtäbä KamAZ maşinalarında berençelekne yawlağan Röstäm Miñnexanov bu çabışlarda da ciñü yawlarmı – bu 10 noyäberdä açıqlanaçq. Ä älegä şunısı bilgele - Tatarstan premyer-ministrı citäkçelegendäge maşina Desert Challenge ralliında berençe urında bara.

Gölnaz İlgizär

XS
SM
MD
LG