Accessibility links

чәршәмбе, 7 декабрь 2016, Казан вакыты 23:19

Tatarstan pensionerları “Ğädel Rusiägä” ışanmıy


Rusiä säyäsi kügendä soñğı arada bolıtlar quyıra başladı. Törle firqälär, säyäsi köçlär torğan sayın xalıq aldında yaxşı atlı bulırğa cıyına. Demokratlar berläşkän bula, läkin inde un yıl berläşä almağannı, xäzer genä kilep çığuğa oxşamağan. Anıñ qarawı patriotlar dip atalğannar berläşä. Ä ul patriotlar küp törle. Alar arasında Rusiä –urıslar öçen dip yörüçeläre dä, nindider suverennaya demokratiä dip laf oruçıları da, bez sentristlar dip, Mintimer Şäymiev unbiş söyläp kilgänne qabatlawçılar da citärlek. Berdäm Rusiä firqäse menä şuşı sentrist, yäğni urtalıqta buluçılardan. Läkin, Berdäm Rusiä soñğı yıllarda Rusiä kügendä balqıp torğan yoldız buludan tuqtap qaluğa oşağan axrısı. Çönki, soñı waqıtlarda yaña ber firqä , berläşkä säyäsi köç ayaqqa basıp kilä häm Berdäm rusiä firqäseneñ awızınnan maylı qalcalarnı ala başladı. Ul Ğädel Rusiä dip atala. Monısın Rusiäneñ märtkä kitkän berniçä firqäse tudırdı. Döresen äytkändä, mäğlüm Çernomırdin äytmeşli, Rusiädä nindi genä firqä tözemä, KPSS kilep çığa. Menä bu Ğädel Rusiä firqäse dä KPSS kebek ük bulmasa da, ilneñ töp säyäsi firqäse bularağ omtıla. Qalcaları isä , älegä Rusiä töbäklärendäge saylawlarda ciñülärgä ireşü digäne inde. Menä küptän tügel genä, samara şähärendä, Putin yaqlağan Berdäm Rusiä firqäse keşese tügel, gärçä ul berniçä yıl mer bulıp eşläp kilgän bulsa da, ä Ğädel Rusiä firqäse wäkile ciñde. Bu Ğädel Rusiä artında da, qayber küzätüçelär Mäskäw Kremlen kürälär anısı. Monısı belgeçlär kürgäne. Ä ğadi xalıq älegä Rusiäneñ Jizn' – Tormış, Watan- Rodina häm pensionerlar firqälären genä kürä. Menä bu öç firqä berläşte dä, ber yaña säyäsi köç tudırdı. Ğädel Rusiä dip. Bu berläşkän köçlärneñ berse genä Däwlät Dumasında üz wäkillären buldıra alğan ide. Ä Federal' Cıyın räise Mironov citäklägän firqä isä gel Putin säyäsäten yaqlap kilde. Bu firqädä şaqtıy ğına tä'sirle urınnı Çallınıñ elekkege merı Altınbaev ta biläp ora. Bilngele bulğança, anıñ Tatarstan türäläre belän mönäsäbäte qatlawlıraq. Annan soñ, Tatarstan prezidentı, Rodina- Watannı elek Rogozin citäklägändä şulay uq önäp betermäwen belderep kilgäli ide. Bu Pensionerlar, tormış häm Watan berläşte berläşüen dä, tik menä Tatarstanda alay uq bulıp çıqmadı.

Bu könnärdä, Qazanda uzğan Pensionerlar firqäseneñ Tatarstan bülekçäse cıyılışında Ğädel Rusiägä kermiçä, ä möstäqil oyışma bulıp qaluları xaqında belderdelär.

Älege oyışmanıñ räise Vitaliy Smirnov Azatlıqqa bu xaqta menä närsä dide

Bez niçek kenä bulmasın, Rusiäneñ pensionerlar firqäse ideologiäseneñ warisları bulıp qala biräbez. Şuña kürä, Ğädel Rusiädä pensionerlarnıñ mänfäğätläre yaqlanmayaçağın añlıybız. Ğädel Rusiä üz aldına bik kiñ maqsatlar quya. Rusiädä qırıq million pensionerlar bar. Bu xätle xalıq öçen, üzen säyäsi yaqtan yaqlar öçen ayırım ber firqä kiräk. Annan soñ, şunı da añlarğa kiräk. Menä bu Ğädel rusiäne oyıştırıp yörüçelär elek tä, xäzer dä xakimiättä idelär, läkin alar ğämäli yaqtan pensionerlarnıñ mänfäğätlären yaqlamadılar. Şul uq taşlamalarnı beterü xaqındağı qanunnı da, ciñel genä uzdırıp cibärdelär.

Bu Tatarstan pensionerları oyışması räise Vitaliy Smirnov buldı.

Anıñ süzlärenä qarağanda, Rusiädä pensionerlar firqäse qalmasa da, Tatarstanda mondıy isemdäge oyışma bulaçaq. Tora –bara, alar üzläreneñ äğzaların 10 meñgä citkerergä uylıylar. Ä älegä 600 keşe äğza bulıp tora. Ägär eşlär xutka kitsä, Rusiä külämendä yaña säyäsi firqa, pensionerlar mänfäğäten yaqlıy torğan säyäsi köç buldıru niätläre.

Räfis Cämdixan

XS
SM
MD
LG