Accessibility links

якшәмбе, 4 декабрь 2016, Казан вакыты 11:21

Başqortstanda suqbaylar sanı arta


Başqortstanda bu atnada yort-cirsez can asrağan keşelär mäsälälärenä iğtibar artuı sizelde. Respublikanıñ xoquq saqlaw oyışmaları suqbaylarnı açıqlaw häm alarnı isäpkä aluğa bäyle maxsus operatsiäsen tämamladı. Ä atnakiç könne Ufadağı suqbaylarnı sıyındıruçı, alarğa törle yärdäm kürsätüçe komplekslı sotsial' üzäk wäkilläre şuşı temağa bağışlap üzläreneñ kiñäşmäsen ütkärde.

Älege üzäkneñ citäkçese Zäynäp Nazarova süzlärençä, Başqortstanda häm şul isäptän Ufada da yort-cirsez kön kürüçe keşelärneñ sanı küzgä kürenep arta. Äle räsmi sannar buyınça ğına da Başqortstanda suqbaylar sanı 6 meñgä citkän. Läkin qayber belgeçlär mäğlümatlarına kürä, xäzer respublikada yort-cirsez can asrawçılar 20 meñgä citä. Zäynäp Nazarova süzlärençä, respublikadağı suqbaylarnıñ barısı da Başqortstan keşeläre tügel. “Alarnıñ baytağı kürşe töbäklärdän dä kilälär, - di Zäynäp xanım. – Suqbaylarnıñ zur küpçelege eçkeçelekkä birelgän, törle çirlärgä sabışqan, tormış töbenä töşkän keşelär. Şunısı da iğtibarnı cälep itä – suqbaylarnıñ 10 protsentı çaması yuğarı belemle. Alarnıñ qayberläre elek xätta yuğarı wazıyfalar da bilägän. Ämma törle säbäplär arqasında, xäzer alar uramda torıp qalğan”.

Zäynäp Nazarova äytüençä, Ufadağı komplekslı sotsial' üzäktä genä dä 1,5мең suqbay räsmi terkälgän. Alar biredä yılına 3 tapqır 10ар kön däwamında yäşi. Şul waqıtta alar däwalanu ala häm buşlay tuqlandırıla. Läkin Zäynäp xanım süzlärençä, Ufada terkälmägän suqbaylar da küp. “Alarnı isäpkä alu häm sotsial' yärdäm kürsätü öçen barlıq oyışmalarnıñ köçen berläşterü kiräk”, - dip isäpli ul.

Ufada suqbaylarnı sıyındıruçı komplekslı sotsial' üzäkneñ citäkçese Zäynäp Nazarova buldı. Anıñ fikerençä, suqbaylarnıñ hiç'yuğı ber öleşen bulsa da cämğiätkä kire qaytaru öçen xoquq saqlaw oyışmalarınıñ, sotsial' yärdäm kürsätü xezmätläreneñ häm Sawlıq saqlaw ministrlığınıñ berlektäge tırışlığı kiräk. Häm iñ möhime – suqbaylar belän eşläwne tä'min itüçe tieşle qanunnar häm normativ-xoquq aktların buldıru taläp itelä.

Äye, Başqortstanda da soñğı yıllarda suqbaylar sanı sizelerlek arttı. Monı, iñ berençe çiratta, cämğiättäge üzgäreşlär, ilneñ bazar iqtisatına küçüe belän bäyläp añlatalar. Rusiädä dä, Başqortstanda da suqbaylarğa, nigezdä, ciränüle, tiskäre qaraş kiñ cäyelgän. Belgeçlär fikerençä, cämğiättä subaylarğa mönäsäbät tamırınnan üzgärmi torıp, alarnıñ sanı kimemäyäçäk, ä arta ğına baraçaq.

Suqbaylarnı normal' tormışqa qaytarıp bulamı soñ? Şuşı soraw belän bez Ufa uramnarında xalıqqa möräcäğät ittek. Cawaplar törleçä buldı. Kemder suqbaylarnı normal' tormışqa qaytarıp bula, dip isäpläsä, ikençeläre monı kire qağa. Niçek kenä bulmasın, Başqortstanda kiläçäktä suqbaylar mäsäläsen xäl itügä nıqlap totınırğa turı kiläçäk. Ber yaqtan suqbaylarnı elekke tormışına qaytaru xästärlege kiräksä, ikençe yaqtan başqa keşelär dä şul köngä qalmasın öçen, tormış däräcäsen kütärü dä könüzäk burıç bulıp qalaçaq.

XS
SM
MD
LG