Accessibility links

чәршәмбе, 7 декабрь 2016, Казан вакыты 00:53

Sember gäzite “Ömet”neñ soñğı sanı tulayım dinebez İslamğa bağışlanğan


Döresräge - ölkä möselman yäşläreneñ alda torğan qorıltayına.

Berençe säxifä Ğosamn Sadäneñ “Ässälämeğaläyküm!” şiğere belän açıla. Yänäşädä – qorıltayda qatnaşaçaq yäşlärne sälamläw yazması. Anda cıyınğa çaqırılğan märtäbäle qunaqlar atala, 750 delegatnıñ nindi rayonnardan, şähärlärdän kiläçäge bäyän itelä.

“Ömet”neñ möxärrire İsxaq Xälimevneñ Tat'yana Sergeeva belän äñgämäse “Cannarığıznı märxämätle ğämällär belän bizägez!” iseme astında birelgän. Tat'yana xanım ölkä başlığınıñ dini häm milli mäs'älälär buyınça kiñäşçese wazifaların başqara. Äñgämädä süz alda torğan qorıltayda nindi ölgergän mäs'älälär kütäreläçäge, İslam cämäğätçelegeneñ uñay ğämälläre, xakimiätneñ milli häm dini oyışmalar belän xezmättäşlek ısulları turında bara.

İkençe säxifä – Qorıltaynıñ kön tärtibe häm tügäräk öställär belän tanıştıra. Biredä şulay uq Ölkä başlığı Sergey Morozovnıñ, Rusiä möftiläre Şurası räise Rawil xäzrät Ğaynetdinneñ, ölkädä eşläp kilüçe ike möftineñ Qorıltay delegatlarına yünältelgän sälam süzläre birelgän.

Öçençe säxifäneñ yartısın möfti Fatıyx xäzrät Aliullovnıñ tirän eçtälekle wäğäze bili. İslam dineneñ çın asılın, yäş buınnı kiñ taralğan bozıqlıqtan fäqät İslam dine nigezendä genä saqlap qalu mömkinlegen açıp sala bu wäğäz. Şuşı uq bittä Mäläkäs rayonı, Dimitrovgrad şähäre başlıqları, rayon üzägeneñ deputatları Şurası räise häm imam-möxtäsib Färit xäzrät Sämigullov qul quyğan Kileşü birelgän. Anıñ maqsatı - rayonda häm şähärdä ruxi mädäniätne torğızu, ruxi-äxlaqi häm patriotik tärbiäne qulğa-qul totınıp oyıştıru häm başqaru.

4-nçe säxifä tulayım yäşlärgä bağışlanğan. Anda Rafail Dävätäyevneñ “Tatar yäşläre kiñäşte” digän yazması, Pedagogiä universitetında eşläp kilüçe tatar bülekçäseneñ 1-kursına kergän talibälärgä student biletları tapşıru çarası turında Älfiä Xakimovanıñ mäqäläse ayıruça iğtibarnı cälep itälär. Säxifädä şulay uq bıltır İdelbuyı töbäklärennän cıyılğan törle millätlär yäşläreneñ Semberdä uzğan Assambleyase Ölkä xakimiätenä yullap qabul itkän möräcäğät tä urın alğan. Anıñ mäğnäse häm eçtälege – isemendä ük: “Bez törlelär, ämma bez bergä!” Säxifä şulay uq yäş qäläm tibrätüçelärneñ şiğri yulların da sıyındırğan.

Sember ölkäsendä tatardan başqa da möselmannar yäşi. Şunlıqtan “Ömet”neñ bu sanı äzeri, qazax, qırğız, üzbäk xalıqlarınıñ üzençälekläre belän dä tanıştıra. Bu yazmalarnıñ häm “Namaz närsä ul?”, “Möselman bäyrämnäre” digän mäğlümätlärneñ urısça birelüe dä urınlı kebek.

Gäzitneñ qalğan öleşe İslam däreslärenä birelgän.

“Ömet” gäziteneñ soñğı sanına küzätü belän Ayrat İbrahim, Sember

XS
SM
MD
LG