Accessibility links

якшәмбе, 11 декабрь 2016, Казан вакыты 01:35

Iran aradaşçısı Ali Laricani Rusiä prezidentı Vladimir Putin belän oçraştı


Irannıñ atom eşläre söyläşülärendäge baş aradaşçısı Ali Laricani bügen ikençe kön Mäskäwdä. Bügen anıñ Rusiä prezidentı Vladimir Putin belän oçraşqanı mäğlüm buldı, ämma bu xaqta äle tulıraq mäğlümat yuq. Comğa könne İran wäkile Rusiä tışqı eşlär ministrı Sergei Lavrov belän oçraştı häm, ägär dä İminlek Şurası İranğa çikläwlär quysa, Tährannıñ Berläşkän Millätlär Oyışmasınıñ atom idaräse belän xezmättäşlekne tuqtatu ixtimalı turında belderde.

Laricanı comğa könne şulay uq Rusiä İminlek Şurası başlığı İgor İvanov belän dä 6 säğätkä suzılğan söyläşülär uzdırdı. Oçraşudan soñ ul, İran söyläşülärgä äzer, dip belderde:

"Atom idaräseneñ tikşerülär uzdıru kiräklegen bez qabul itäbez, bez atom qoralın cäyeldermäw kileşüen ütibez. Nindi dä bulsa qarşılıqlar kilep çıqqan xäldä, bez alarnı söyläşülär yulı belän çişergä äzer."

Ämma İranğa qarata äzerlängän çikläwlär ölgese – Tährannıñ atom idaräse wäkilläre belän mönäsäbätlären bozırğa mömkin, dip östäde ul.

Yevropa illäre täqdim itkän rezolüsiä ölgesendä, İrannıñ atom häm raketa programmalarına çikläwlär kertü, säyäxät itüne çikläw häm atom tikşerenüläre belän şöğellängän İran ğalimnärenä finans çikläwlär kertü qaralğan. Laricanı, bu rezolüsiä ölgesenä, wazğiätne tağın da qatlawlandıru, dip bäyäläde.

"Rezolüsiäne qabul itterergä teläwçelärneñ maqsatı – Yaqın könçığış töbägendä wazğiätne tağın da qatlawlandıru. İminlek digändä İran öçen atom qoralına urın yuq."

Laricaninıñ Mäskäwgä säfärenä kilgändä, söyläşülärdä iğtibar üzägendä – Rusiäneñ Yevropa illäre kertergä telägän çikläwlärne yomşartu täqdime. Tağın ber urtaq tema – Rusiäneñ İran öçen Buşerda atom energiäse qorılması tözüe. İran, atom energiäse tınıç maqsatlar öçen citeştereläçäk, disä dä, AQŞ, Buşerdağı berläşmä – yäşeren qoral citeşterü häm uran bayıtu öçen ber urın bulır, dip borçıla. Rusiä isä qorılmanı açunı haman kiçekterep kilä, bu İranğa oşamıy. Xäzer inde Buşer qorılmasınıñ açıluı 2007nçe yılnıñ közenä bilgelängän.

Alsu Qormaş
XS
SM
MD
LG