Accessibility links

пәнҗешәмбе, 8 декабрь 2016, Казан вакыты 23:09

Könyaq Osetiä referendumda bäysezlek öçen tawış birde


Gruziädän ayırılırğa teläwçe Könyaq Osetiäneñ üzäk saylaw komissiäse yäkşämbe könne ütkän referendumda saylawçılarnıñ 99 protsentı bäysezlek öçen tawış birde dip belderä. Şul uq könne ütkän prezident saylawlarında Könyaq Osetiäneñ xäzerge prezidentı Eduard Kakoyty ciñep çıqtı. Tawış birüdä saylawçılarnıñ 95-läp protsentı qatnaşqan dielä. Ämma respublikanıñ görcilär qaramağındağı öleşläre ul tawış birüdä qatnaşmadı. Alar bu könne üzläreneñ referendumın häm prezsident saylawın ütkärde.

Könyaq Osetiä başqalası Tsxinvalida uzğan töndä osetin biüläre, sarılı-qızıllı-aqlı Könyaq Osetiä älämnäre belän bäyräm ittelär. Saylawçılar respublikanıñ Gruziädän ayırıluı öçen tawış birde. Xäyer ferendumnıñ näticäse şulay bulaçağı aldan uq härkemgä mäğlüm ide.

Kakoytınıñ ciñüen häm referndum näticäsen cirle üzäk saylaw komissiäse başlığı Bela Plieva iğlan itte.

"Eduard Cabey ulı ışanıçlı ciñügä ireşte. Referendumğa kilgändä, 100 protsent diärlek respublikanıñ bäysezlege öçen tawış birde" dide Plieva.

Bu tawış birülärdä qatnaşu öçen Könyaq Osetiä pasportına iä bulu zarur ide. Respublikada yäşäwçe görcilärneñ küpçelege isä andıy pasportlar almadı.

Yäkşämbe könne Kakoytı Könyaq Osetiäneñ bäysezlek yulın däwam itäçägen belderde.

"Bez 1992 yılğı referendum näticälären tağın ber märtäbä raslıybız. Häm bez tulısınça döres eşlädek dip isäplibez. Bu referendumda bik küp çit il küzätüçeläre, kiñküläm mäğlümät çaraları wäkilläre qatnaşa. Alar üz tamaşaçılarına, uquçılarına Könyaq Osetiä xalqınıñ üz bäysezlegen ni qädär bäyäläwen citkerergä tieş" dide Kakoytı.

Könyaq Osetiä 1991-92 yıllardağı qısqa, ämma qanlı suğıştan soñ Gruziägä buysınmıy başladı. Ul suğışta yözlärçä keşe üterelde, distälärçä meñe yortların taşlap kitärgä mäcbür buldı.

Barı Mäskäw genä referendum näticälären xörmät itärgä kiräk dip belderde. Xalıqara cämäğätçelek isä bu referendumnı tanımayaçaq.

Yewropa Şurası general sekretare Terry Davis bu referendum, kiräksez, faydasız häm ğädelsez buldı dide.

Davis xalıqara cämäğätçelek anıñ näticälären tanımayaçaq dide.

Xalıqara cämäğätçelek şulay uq Könyaq Osetiädä yäşäwçe görcilärneñ referendumın häm prezident saylawın da tanımayaçaq. Andağı görcilär ul könne alternativ tawış birülär, Könyaq Osetiä Tiflis belän söyläşülärne däwam itärgä tieşme digän başqa ber referendum, häm üzläreneñ prezident saylawların ütkärde.

Görcilär respublika xalqınıñ 30-40lap protsentın täşkil itä häm alar başqala Tsxinvalidan tönyaqtağı awıllarda yäşi.

Xäzer Gruziädä yäşäwçe küp kenä qaçaqlar Könyaq Osetiägä tawış birügä avtobuslar belän alıp barıldı.

Bu alternativ saylawlarda Könyaq Osetiäneñ elekke premyer ministrı Dmitri Sanakoyev 88 protsent tawış belän ciñep çıqtı. Sanakoyev Könyaq Osetiäneñ Gruziädä qaluın teli.

Gruziä parlamentınıñ Yewropağa integratsiälänü komitetı räise David Bakradze Azatlıq radiosına

"Nizağ şartlarında saylawlarnıñ ğämäli bulu-bulmawı turında äytep bulmıy. Ämma alternativ saylawlarnıñ ütkärelüe häm qantaşuçılarnıñ küpçelegeneñ Kakaytıdan başqa namzätlärne yaqlawı, Tsxinvali töbäge xalqınıñ zur öleşeneñ Kakoytı xakimiäten telämäwen, Rusiä säyäsi köçläre tarafınnan manipulyatsiälänüne telämäwen häm xalıqnıñ, açıqça äytkändä, tınıçlıq, söyläşülär häm nizağnıñ çişelüen teläwen kürsätä" dide.

Tsxinvali ütkärgän referendum sintäberdä küzläw cäncalınnan soñ Mäskäw belän Tiflis arasında ayıriça köçäyep kitkän kierenkelekne tağın da arttırdı.

Naif Aqmal, Praga.
XS
SM
MD
LG