Accessibility links

шимбә, 10 декабрь 2016, Казан вакыты 08:18

Elekke qaçaq uñışlı käsep qora alğan


Könbatış belän könçığış arasındağı kierenkelek, mädäniätlär arasındağı qarşılıqlar, älbättä, Yewropa illärenä küçep kilgän möhacirlär yazmışında çağılış taba. Şul uq Britaniägä kilgän qaçaqlar, sıyınu sorawçılar yış qına matbuğatta cirle xalıq cilkäsenä "östämä yök" itep taswirlana. Ä menä "kilmeşäklärneñ" uıñışları, bu ilneñ iqtisadına öleş kertü misalları turında siräk işetelä.

Bosniä qaçağı Peter Padu isemle yegetkä Londonğa kilgändä ni barı 15 yäş bulğan. Üze äytüençä, anıñ kesäsendä 30 alman markası, awızında – şul uq sanda ingliz süze bulğan. Bügen aña 29, uzğan yıl Londonnıñ iñ uñışlı yäş eşquarı dip tabılğan.

"Min monda kilgändä mine närsä kötäsen belmi idem, şunı ğına belä idem – uñışlı biznes qorırğa telädem. Berençe käsebemne 12 yäşemdä elekke Yugoslaviädä başladım. Duslarıma, keçe şirkätlärgä sanaqlar, programnar satıp, şaqtıy kesä açqası eşlädem".

Londonğa kilgäç Padu ingliz telen öyrängän, mäktäp, universitet betergän, berniçä eş eşläp qarağan, axır çiktä sanaqlarğa tuqtalğan, 3 yıl elek üz şirkäten açıp cibärgän.

Näq şul waqıtta Yewropa Berlege äğza illärne iske elektron cixazlar, computer-sanaqlarnı tirä-yün moxitkä zıyan kitermäslek itep yaraqlaştırırğa mäcbüt itkän program buldırğan. Britan şirkätläreneñ kübese bu eş belän şöğellänergä telämägän. Ä menä Padu moña alınğan.

Anıñ Maxitech isemle şirkäte iske sanaqlarnı sütep-cıyıp, yaraqlaştırıp, qabat eşkä cigä. Sotsial yünäleşläre dä bar, eş yuğaltqan keşelärgä Mäğlümät Texnlogiäsen öyrätälär:

"Zur şirkätlärdän tämam iskerep betkän sanaqlar alabız da alarnı yaraqlaştırıp, mömkinlege bulmağan, eşsez keşelärne, qaçaqlarnı uqıtu öçen qullanabız. Berük waqıtta şaqtıy aqça eşlibez. İske sanaqlarnı erätkä kiterep, alarnı, yaña computer satıp ala almağan keçe şirkätlärgä satabız."

Padunıñ şirkätendä xäzer 16 keşe eşli. Ul ber-ber artlı büläklär ala. Uzğan yıl Londonnıñ iñ uñışlı yäş eşquarı dip tabılğan. Uzğan ayda HSBC bankı anıñ Maxitech şirkäten ilneñ iñ tiz üsep kitkän 10 şirkät isemlegenä kertkän.

"Miña bik küp yärdäm ittelär, min bu ilgä bik räxmätle. Xäzer beraz kire qaytara alsam şäp bulır ide."

Padu käsebeneñ uñışlı buluı belän genä tügel, ä anıñ tirä-yüm moxitkä häm dä moxtac keşelärgä faydalı buluı belän dä ğorurlana.

Ali Ğilmi
XS
SM
MD
LG