Accessibility links

сишәмбе, 6 декабрь 2016, Казан вакыты 08:55

Tatarstanda terrorçılarnı ezläw urınlımı?


Pänceşämbe könne Däwlät Şurasınıñ öçençe çaqırılıştağı yegerme cidençe utırışı uzdı. Utırış eşendä şulay uq Tatarstan Prezidentı Mintimer Şäymiev ta qatnaştı. Kön tärtibendä - utız dürt mäs'älä täqdim itelde. Ayırım alğanda 2007 yılğa respublika byudjetı, kiläse yılğa Mäcbüri meditsina iminiäte fondı byudjetı turında” qanun proyektı qaraldı. Şulay uq küp kenä Rusiä töbäkläreneñ sotsial' ölkälärgä, uyın biznesına qağılışlı qayber möräcäğätläre buyınça da fiker alışu buldı. Utırış barışında deputat Tufan Miñnullin “Şähri Qazan” gazetasında basılğan Fäwziä Bäyrämovanıñ mäqäläsenä xoquq saqlaw orğannarınnan añlatma birülären soradı. Ni öçen bu mäqälä däwlät şurasında qızıqsınu uyattı häm mäqälädä kütärelgän töp mäs'älä närsä turında soñ? “Şähri Qazan” gäziteneñ 14 noyäber sanında yazuçı, İttifaq tatar milli bäysezlek partiäse räise Fäwziä Bäyrämovanıñ “119468 nomerlı eş” dip atalğan şaqtıy külämle mäqäläse basılıp çıqtı. Mäqälädä süz monnan ike yıl elek, noyäber ayında Tatarstan şähärlärennän ber törkem möselmannarğa qarşı cinayät eşe quzğaltılap, qulğa alınğan tatarlarnıñ barısı da Tatarstan territoriäsendä terror ğämälläre oyıştırırğa äzerlänüdä ğäyeplänär. Älege cinayät eşe äle dä däwam itä, mäxkämä eşläre haman kiçekterelä. İmeş alar Qazannıñ meñellığında terror aktları eşlärgä cıyınğannar, imeş Tatarstannıñ zur zavod häm qorılmaların şartlatırğa uylağannar ikän dip yaza mäqälä avtorı. Şulay uq avtorı süzlärenä qarağanda, bu cinayät eşen açu öçen Tatarstan prokuraturasınıñ üterü häm banditlıqnı tikşerü buyınça bülek xezmätkäre Konstantin Zamarev häm FSB podpolkovnigınıñ ulı Yevgeniy Vikent'yev alına. Häm alar möselman-tatarlarnı terrorçılıqta faş itü öçen dönyada tiñe bulmağan eşçänlek cäyelderep cibärälär, şulay itep, bäysezlekkä häm imanğa omtılğan tatarlardan tağın ber tapqır üç alalar di Fäwziä Bäyrämova. Mäqälä avtorı süzlären qarağanda, Tatarstanda xoquq saqlaw orğannarı ber ğäyepsezgä tatarlarnı ezärlekläp, terrorçılıqta ğäyeplilär. Äle alay ğına da tügel ikän, waqıtlı törmälärdä alarnı anda tuqtawsız qıynıylar, eşlämägän cinayätlärne üz öslärenä alırğa qısalar, ğärip qaldıru häm mäñgelek törmä belän yanıylar ikän. Pänceşämbe könne Däwlät Şurası utırışında deputat Tufan Miñnullin “Şähri Qazan” gazetasında basılğan Fäwziä Bäyrämovanıñ mäqäläsenä xoquq saqlaw orğannarınnan añlatma birülären soradı. “Şähri Qazan” gäziteneñ 14 noyäber sanında yazuçı Fäwziä Bäyrämovanın mäqäläse basılğan. anda mäqälä avtorı Tatarstandağı xoquq saqlaw organnarınıñ ber ğäyepsezgä 22 möselmannı terrorçılıqta ğäyepläp, ezärlekläwe turında yazılğan. Mäqälä bik citdi. Ägär dä andağı yazılğannar döres bulsa, Tatarstandağı terrorçılar törkeme eşli digän ber fiker qala. Şuña kürä menä bu mäqälä turında xoquq saqlaw orğannarınıñ fikerlären beläse kilä ide, mäğlümat. Çönki anda qurqınıç faktlar yazılğan. Anda xätta 13 yäşlek malaynı terrorçılıqta gäyepläp törmägä utırtıp quyğannar. Menä şuña kürä bügen xoquq saqlaw orğannarınıñ wäqälätle berär keşese mäğlümat birsen ide bu turıda. Mäqälä avtorı döres yazamı, ällä yuqmı? Menä şuşı mä'sälädä deputatlar belep torırğa tieş dip sanıym. Çönki bu respublikanı totıştan ğayıpläw turında süz bara.” Älege täqdim qabul itelde, ämma Tatarstan Prezidentı xoquq saqlaw orğannarınıñ bu mäsälägä añlatmasın yabıq işeklär artında tıñlarğa täqdim itte. “Sez bit üzegez berençelärdän bulıp işetäsegez kilä bu turıda. Şulay bulğaç, xoquq saqlaw orğannarı çığış yasarğa äzerlängäç, yabıq işeklär artında söyläşerbez. Mäqälägä genä tayanıp fiker yörtep bulmıy. ” Şulay itep, deputatlar terrorizmda ğäyeplänep, qulğa alınğan tatar keşeläre turında mäğlümatlarnı yabıq şartlarda tıñlarğa buldılar. Şunlıqtan älegä xoquq saqlaw orğannarınıñ añlatması mäğlüm tügel. Bu beleşmäneñ eçtälege mäğlüm bulğaç ta, anı sezgä citkererbez. Gölnaz Şäyxetdin

XS
SM
MD
LG