Accessibility links

пәнҗешәмбе, 8 декабрь 2016, Казан вакыты 01:08

Başqortstanda partiälärne tışawlıylar


Başqortstanda yaqın kiläçäktä barlıq partiälär häm ictimaği oyışmalar tärtä arasına kerergä, tışawlanırğa mömkin. Respublika prezidentınıñ atnakiç könne dönya kürgän ber färmanı eçtälege şuña işarä yasıy. Mortaza Räximov üzeneñ xakimiätendä Eçke säyäsät idäräse digän yaña oyışma tözü xaqında färmannı imzaladı. Anıñ burıçı bulıp säyäsi partiälärneñ häm törle ictimaği xäräkätlärneñ eşçänlegen koordinatsiäläü tora. İkençe törle itep äytkändä, barlıq partiälär häm xäräkätlär xäzer prezident xakimiäteneñ qulı astında bulırğa mömkin. Bu yañalıqnı küp kenä belgeçlär şunda uq kiläse yılda Başqortstan Dählät Cıyılışına häm Rusiä Däwlät dumasına saylawlar aldınnan törle partiälärne üz qullarına alırğa tırışu omtılışı dip bäyäläde.



Eçke säyäsät idäräse digän bülekkä Ural Xäsänov atlı 29 yäşlek kenä säyäsät belgeçe citäkçelek itäçäk. Näq menä ul 2003 yılda Başqortstan prezidentın saylawlar waqıtında Mortaza Räximov komandasında bik nıq tırışıp eşlägän ide. Xäzer dä ul Başqortstan Prezidentı xakimiäte başlığı Radiy Xäbirov qulı astında xakimiätlärneñ säyäsäten uñışlı ütkärü öçen bar säläten birer, dip belderä küzätüçelär.

Mäğlüm buluınça, törle federal' partiälärneñ Başqortstandağı bülekläre respublika xakimiätläre tırışlığı belän telsez-teşsezgä äylänep bettelär. “Şulay da qayber partiälärne häm bigräk tä oppozitsiädäge ictimaği xäräkätlärne awızlıqlısı kilä Başqortstan citäkçeläreneñ, - di kiñ bilgele tatar ğalime İldar Gabdrafıykov. – Qaysısın maylap, qaysısın qurqıtıp, alarnı da ğomum tärtä arasına kertergä tırışu omtılışları bik köçle. Bu omtılışta Mortaza Räximov färmanı belän oyıştırılğan Eçke säyäsät idäräse zur eş başqara alırğa mömkin”.

XS
SM
MD
LG