Accessibility links

чәршәмбе, 7 декабрь 2016, Казан вакыты 00:50

Şäymiev ITAR-TASS xäbärçeläre belän aralaştı


17-18 noyäber könnärendä Qazan kirmänendä İTAR-TASS mäğlümat ağetlığı xäbärçeläre belän Bötenrossiä kiñäşmäse ütkän ide. Anda İTAR-TASS agentlığı citäkçeläre, Rossiä häm çit ildäge xäbärçelär qatnaştı. Mäsälän, Estoniä, Litva, Törkiä, Finländiä , İtaliä häm başqa illärdä näşer itelüçe rus telle gazeta-jurnal möxärrirläre bar ide. Ä 18 noyäberdä bu kiñäşmädä Tatarstan Prezidentı Mintimer Şäymiev İTAR-TASS agentlığınıñ general' direktorı Vitaliy İgnatenko belän oçraştı.

Tatarstan Prezidentı Mintimer Şäymievnıñ İTAR-TASS agentlığı häm çit il jurnalistları belän şaqtıy canlı ütkän söyläşüe ike säğättän dä artıq bardı. Biredä İTAR-TASS agentlığı citäkçese Vitaliy İgnatenko, anıñ urınbasarı Mixail Ğusman, Tatarstan Premyer-ministrı urınbasarı – mädäniät ministrı Zilä Wäliewa, Tatarstan Prezident Apparatınıñ eçke säyäsät mäsäläläre buyınça idärä başlığı Aleksandr Terent'yev buldı.

Kiñäşmädä Mintimer Şäymiev jurnalistlarğa “Sezneñ belän näticäle xezmättäşlek barına min ğorurlanam, iñ möhime, ul respublika eşçänlegenä yärdäm itä”sezneñ kebek täcribäle xalıqnıñ zur delegatsiä sostavında kilüe, respublika öçen qäder-xörmät”, dip belderde.

Ber-berse belän cılı säläm süzläre alışqannan soñ, Şäymiev xäbärçelärgä respublikanıñ sotsial'-iqtisadi mömkinleklären söyläde, törle tarmaqlardağı qazanışları belän tanıştırdı. İnvestitsiälär turında süz kergäç, Şäymiev bolay dide:

“Soñğı yıllarda Tatarstan iqtisatı häm sänäğäte nığıdı. Moña çittän kerüçe investitsiälär yärdäm itä. Qazanda üz filialların açarğa telägän şikle banklarnı bez berqayçan da kertmädek. Xäzer dä banklar bezdä üz filialların açarğa telilär ikän, respublika üseşenä investitsiälär kertep, yärdäm itärgä äzer bulsın alar”.

Şulay uq äñgämädä mäktäplärne komp'yuterlaştıyru häm internet çeltärenä totaştıru mä’säläse kütärelde. Awıl mäktäpläreneñ kiläçäge turında söylände.

Kiñäşmä barışında Prezident neft' sänäğäte xaqında süz quzğattı. Qara altın respublikanıñ töp baylıqlarınnan berse. Ämma kiläçäktä neft' tabudan tış ta respublikanıñ tulayım töbäk produktınıñ artaçağı turında belderde. Monıñ öçen Tatarstannıñ neft'sez kiläçäge turında maxsus programma da qaralğan ikän.

Xäbärçelär şulay uq Prezidentqa toraq mä’säläse buyınça da sorawlar birde. Şäymiev isä bolay dide. “İldä xäyerçe keşelär yäşägändä, däwlät bay bula almıy. Ä bügenge köndä fatirlarnı küp keşe ala almıy. Şuña kürä ipoteqa kreditı yılına 5-6 protsenttan da artmasqa tieş”, dide Şäymiev.

Oçraşuda awıl xucalığı reformaları da zur qızıqsınu uyattı. Şäymiev äytüençä,

bügenge köndä awıllarğa köçle banklar zur aqçalar kertä. Şulay investorlar yärdäme belän awıllarda megafermalar, yaña yullar tözelä. Berniçä yıldan Tatarstan awıl xucalığı turında çittä tä beläçäklär, dide Şäymiev.

Şulay äñgämädä küp kenä başqa sorawlar da quzğatıldı. İl başlığı respublikada at ürçetü, boz sarayları tözelüe, häm ğomumän sportı üseşe turında centekläp söyläde. Prezidentqa ber-ber artlı sorawlar yawdı, ul ixlas cawap birä tordı. İTAR-TASS citäkçese Vitaliy İgnatenko da “Jurnalistlar auditoriäsendä monnan da ixlas häm açıq oçraşuda bulğanım yuq ide äle” dide. Oçraşuda Şäymiev belän İgnatenko üzara büläklär dä almaştılar. İgnatenko Prezidentqa “Matbuğat dustı” Maqtawlı bilgesen tapşırdı. Ä Şäymiev isä İgnatenko häm anıñ berençe urınbasarı Mixail Ğusmanğa “Qazannıñ meñyıllığı istälegenä” medalen tapşırdı.

Güzäl Zıyätdinova.

XS
SM
MD
LG