Rusiä Xisap pulatı räise Sergey Stepaşin, Qazanğa säfäre waqıtında, Tatarstanda budjet aqçasın maqsattan çittä qullanu oçrağı açıqlanmadı, dip belderde. Bu xaqta ul Xisap pulatınıñ Tatatrstanda ütkärgän tikşerüe yomğaqlarına bağışlanğan utırış waqıtında äytte. Kremldä Tatarstan prezidentı Mintimer Şäymiev belän bergä ütkärelgän bu utırışta “2001-2006 yıllarda Tatarstanda sotsial' iqtisadıy tärräqıyat” programmasına berençel näticä dä yasaldı. Stepaşin anıñ tulısınça diärlek tormışqa aşqan iñ uñışlı federal' programma buluı turında äytte. “Keşelär yaxşıraq yäşi başladı, şähär küzgä kürenep üzgärde, awıl xucalığı häm sänäğät üseştä. Bu programma başqa töbäklär öçen ürnäk bula ala”,- dide.
