Accessibility links

шимбә, 3 декабрь 2016, Казан вакыты 01:38

Totqınnar öçen xristian telekanalı kürsätä başlıy


İrektä bulğanda keşe ni öçen yäşägäne, bu dönyağa nigä kilgäne xaqında bik uylanmıy. Uylasa da sirägräkter. Ä älege uylar räşätkä artına eläkkän keşelärgä tınğı birmi. Üz üzenä qalğaç, alar fälsäfi temalar xaqında bik yış uylana. Xäyer, barısı da tügel, älbättä. Näq şuşı cirdä irektä Allağa ışanmağan keşelär dä ışana başlıy.

Älege keşelär öçen törmälärdä maxsus mäçetlär, çirkäwlär açıla. Tatarstan törmälärendä şundıy biş mäçet bar. Alarnıñ yanında çirkäwlär dä açıla. Bu arxitektura qorılmalarınıñ üz manaraları - ay, täreläre dä bar. Mäçetläre bulmağan törmälärdä gıybädätxänä öçen bülmälär birelgän. Belgeçlär äytüençä, räşätkä artında utıruçılarnıñ yartısı möselmannar. Şulay da törmä mäçetlärenä, gıybädätxänälärenä härkem dä kerä almıy. Üzen bik tärtiple totuçılarğa ğına bu izge urınnarğa kerü röxsäte birelä.

Yaqın kiläçäktä Rusiä törmälärendä utıruçılar öçen xristian telekanalı da kürsätelä başlayaçaq. “RİA Novosti” mäğlümat agentlığı xäbär itüençä, kiläse yıldan älege iärçen telekanal Tatarstanda da tapşırılırğa mömkin. 4-6 säğät däwamında räşätkä artında utıruçılar öçen näfis fil'mnar, äxläk, sport başqa yunäleştäge tapşırular kürsäteläçäk. Alar telekanalnıñ redkollegiäse tarafınnan saylanıp kürsätelä. Bu oçraqlı xäl tügel. Bilgele bulğança, soñğı waqıtlarda Rusiädä xristian dinen propagandalau eşe bik aktiv bara. Menä ul törmälärgä dä ütep kerä başladı. Şuşı xaqta belgeçlärneñ fikeren tıñlap qarıyq. Tatarstandağı 2nçe koloniäneñ citäkçese Färğät Gallyamov söyli:

Minemçä, bu bik äybät närsä inde. Menä äle üzebezneñ koloniädä çirkäw dä tözep yatabız. Mäçet bezdä inde ike yıl eşli. Anda 60лап keşe yöri. Çirkäw bulmağaç, gıybädätxänägä yöri 20 keşe.

Tatarstan Diniä Näzaräteneñ räise urınbasarı Wäliulla Yaqub isä bu xaqta menä nindi fikerdä tora:

Ul törmälärdä bit xristiannar ğına tügel, möselmannar dä küp. Din qärdäşlärebez öçen ber tapşıru bar, ämma ul bik qısqa, äle citmäsä uñaysız waqıtta tapşırıla. Xristian telekanalı bulğaç, hiçşiksez möselmannarnıqı da bulırğa tieş. Ğädel bulsın öçen.

Xäyer, törmädän çıqqaç, biredä namazğa, urazağa öyrängän keşelär dä dinne onıta. Älbättä, barısı da tügel. Bu keşelärgä cämğiättä üz urının tabuı bik awır. Şuñadır küp keşe cinayät yulına basıp, yänä iregen yuğalta.

Al'bina Zäynulla

XS
SM
MD
LG