Accessibility links

якшәмбе, 11 декабрь 2016, Казан вакыты 03:18

Samar Cämiğ mäçetenä bağışlanğan buklet çıqtı


Samarnıñ dürt yaqlap transport arteriäläre kiseşkän mäydanda, zur park yanında Samar Cämiğ mäçete üzeneñ möselmanlıq simvolın 60 metr bieklekkä kütärep bügenge tatarlarnıñ däräcäsen üsterä. Ğäyetlärdä biş meñ keşe yomşaq palaslar östendä, diwarlarınnan nur sirpelgän binada qısqa waqıtqa ğına cir mäşäqatennän ayırılıp küñellären täñrebezgä yünältälär. Samar Cämiğ mäsceden eçtän dä, tıştan da, tirä yun baqçasın da bertuqtawsız maturaytalar. Bu oluğ sänğäti xezmätne mäçetneñ räise Färid Äyupov citäkli häm bu yünäleştä ul mal da qızğanmıy. Maturlıq çığımnar taläp itä häm menä şul maturlıq üze ük mäçetkä yañadan matdi keremnär kiterä. Asılı şunda ki, çit mämläkätlärneñ biş yoldızlı qunaqxanälärendä ocmax räxäten kürgän eşquarnı yarım podvalda urnaşqan ğibädätxanägä kertä almıysıñ. Ğaräp illärendäge mäscedlärdä namaz uqıp qaytqan tatar bayların qısan, hawasız binada namazlıqqa bastıra almıysıñ. Monı Färid Äyupov işetep kenä belmi, ul üze monı kiçergän adäm. Samar Cämiğ mäçeteneñ eçen maturaytqan sayın, xalıq kübräk kilä. Bu inde sädäqa tartmasınıñ eçtälegenä dä tä''sir itä.

Tarixta berençe märtäbä Samar mäçetenä bağışlanğan zur, zatlı, nurdan ğına çikkän buklet dönya kürde. Buklet 25 räsem - fotodan tora. Färid Äyupovnıñ xıyalın fotograflar tarixi mizgelgä äyländergännär. Ğibadät zalına kerü basqıçları, ğibädät zalınıñ idännäre, tüşäme, divarları, mixrab, minbar, sänderälär, bällür yaqtırtqıçlar – bolar barçası da soqlanğıç sürätlär. Bu cıyentıqnı turistlarğa da, patşalarğa ğorurlıq xise belän tottırırğa bula.

XS
SM
MD
LG