Accessibility links

чәршәмбе, 7 декабрь 2016, Казан вакыты 23:15

Çallı aynıtqıçında bäyälär arta


Bügengä qädär Çallı aynıtqıçına elägüçelär qunıp çıqqan ber tön öçen 100 sum aqça tülilär ide. Alğa taba araqı yaratuçılar öçen tormış tağın da qimmätlänäçäk. Säbäbe bik ğadıy. 23 noyäber könne şähär Şurası deputatları çirattağı utırışlarında aynıtqıçta yoqlap çıqqan öçen bäyäne 400 sumğa citkerü turında qarar qabul ittelär. Çallı munitsipal' berämlege başlığı urınbasarı, elekkegä äytsäk, şähär Şurası räise Xäydär Gälävetdinov belderüençä, aynıtqıçlarda meditsina xezmäte kürsätü bäyäsen arttıruğa şähär prokurorı moñarçı protest belderep kilgän. İnde, Şura utırışı barışında protest yañğıramadı. Dimäk, bu tör xezmätlär öçen bäyä kütärelü qanunlı bulıp çığa. Aynıtqıçta meditsina xezmäte öçen tüläw ni säbäple arttırılğan soñ? Azatlıq xäbärçeseneñ şuşı häm başqa sorawlarına Xäydär Gälävetdinov bolay dide:

"Bu qararnı qabul itüne berniçä yıl kiçekterep kildek. Çönki, aynıtqıçta elägüçelärneñ ğailäse bar, ul ğailälärne qızğandıq. Xäzer bu mäs'älädä citdi bulır waqıt citte, cämğiät tüzep tora almıy. Eçüçelekkä qarşı köräştä mondıy bäyälär kütärelü tärbiäwi çara da bulıp torır dip uylıym.

Aynıtqıçlarda meditsina xezmätenä bäyälär artu militsiäne aktivlaştırırğa tieş tügel. Bez, deputatlar, alarnıñ namusı öçen cawap birä almıybız. Läkin, aynıtqıçta buluçılar sanı kisken artsa, näticä yasaw mömkinlegebez bar, Äye, üzen-üze tota almawçılarnıñ ğailäläre bu oçraqta zıyan kürergä mömkinnär. Läkin bez bu ğailälärne cäberläw tügel, alarğa yärdäm itü maqsatın quyabız. Çönki Rusiä külämendä eçüçelekkä qarşı köräş bara."

Sez, Çallı aynıtqıçında bäya 100 sumnan 400 sumğa kütärelü uñayınnan Xäydär Gälävetdinov fikerlären işettegez.

Zamanında Çallıda ike aynıtqıç bulıp, uzğan ğasırnıñ azaqlarında, aqça qıyınlığı kilep tuğaç, anıñ bersen yapqannar ide. Xäzer, yartı millionlı şähärdäge aynıtqıçta ber töndä urtaça 60-65, ber ayğa 2000 çaması keşegä meditsina xezmäte kürsätelä. Bu meditsina xezmäte ni räweşle, anıñ sıyfatı artaçaqmı? Älege yazmada barısına da açıqlıq kertü mömkin tügel. Şulay da, militsiägä eläkkän särhüşlärneñ ğailäse dä zıyan küräçäk digän farazlar bar ide. Moña şähärdä taralıp kilgän mondıy mäzäk dälil:

-Äti, aynıtqıç bäyäläre artqan ikän, sin xäzer azraq eçärseñ inde- digän, malayı.

-Yuq, xäzer sezgä azraq aşarğa turı kiläçäk- dip cawap birgän äti keşe.

Ğafiulla Ğaziz, Çallı

XS
SM
MD
LG