Accessibility links

җомга, 9 декабрь 2016, Казан вакыты 07:03

Libanda üterelgän sänäğät ministrı Pierre Cmail cirlände


Bäyrüt üzägenä Libannıñ sişämbe könne üterelgän sänäğät ministrı Pierre Cmail belän xuşlaşu yolasına distälärçä meñ keşe cıyıldı. Bu xalıq cıyını ber ük waqıtta Süriä belän Xizbullanıñ Libandağı eşlärgä tıqşınuına protest belderü çarası dip tä qarala. Cmailnı üterü soñğı 2 yılda Süriägä qarşı şäxeslärne üterüneñ inde 6-nçı oçrağı buldı.

Pänceşämbe könne Bäyrüt üzäge Erbet ağaçlı älämnär diñgezenä äwerelde. Liban xalqı kürşe Süriäneñ ildäge täesirenä qarşı bulğan çirattağı şäxes, sänäğät ministrı Pierre Cmailneñ üterelüenä protest belderde häm anıñ belän xuşlaştı.

Cenaza Bäyrüt üzägendäge çirkäwdä yuğarı citäkçelär, şul isäptän Fransiä tışqı eşlär ministrı Philippe Douste-Blazy häm Ğäräp Ligası başlığı Amr Mussa qatnaşlığında uzdı.

Çirkäwdän tabutnı kütärep alıp çığıp kitkändä doğalar yañğırap qaldı.

Cenazada qatnaşuçılar arasında Süriä yaqlı iñ yuğarı citäkçelärneñ berse, parlament räise Näbi Berri da bar ide. Anıñ Ğämäl törkeme suğışçan Xizbullanıñ berektäşe sanala.

Yaqındağı Şähitlär mäydanında bik küp xalıq cıyılu säbäple tabutnı kütärep baruçılar annan zur awırlıq belän ütte. Mäydanğa xalıq xuşlaşu öçen berniçä säğät aldan uq cıyılğan ide.

Libannıñ könbatış yaqlı xökümät koalitsiäse citäkçeläre cıyılğan xalıq aldında Süriägä qarşı yalqınlı çığışlar yasadı.

Parlamenttağı Süriägä qarşı küpçelek citäkçese Saad Xäriri böten Liban xalqına möräcäğät itep ireklek häm bäysezlekne yaqlaw öçen alarnı bu cenazağa cıyılırğa çaqırğan ide. Anıñ atası, elekke premyer ministr Xäririne dä bıltır fevral ıynda şartlatıp ütergän idelär.

Cmailne üterüne kem oyıştırğanlığı äle bilgesez. Ämma xakimiättäge Dimäşqqa qarşı säyäsätçelär şunda uq Süriägä törtep kürsätte häm Libandağı xällärgä Suriäneñ tıqşınuına protest belderü öçen xalıqnı küpläp cıyılırğa çaqırdı.

Süriä Cmäilne üterügä berär törle qatnaşı buluın kire qağa. Süriä Xäririneñ üterelüe turında BMO tikşerüe xisabı ölgese iğlan itelgän köndä Cmäilne üterü Süriägä mömkin qädär zurraq zıyan kiterü öçen oyıştırılğan di.

Cıyılğan xalıq üzeneñ açuın Süriä prezidentı Bäşär äl Assadqa häm anıñ Libandağı berektäşläre prezident Emil Lähüd belän Xizbulla suğışçan törkemenä qaşrı yünältte.

Cmailnıñ atası, Libannıñ elekke prezidentı Amin cenazanı tınıç qına ütkärergä çaqırdı.

Cmail üterelgännän soñ başqalada iminlek çaraları arttırıldı. Prezident sarayında häm Dimäşqqä iltüçe yullarğa östämä tikşerü qapqaları quyıldı.

Libandağı kürenekle xristian ğailäse äğzası bulğan Cmailneñ cäsäde Bäyrüt yanındağı tuğan awılı Bikfayada cirlände.

Cmail belän bergä anıñ tän saqçısı Samir Şartuni da üterelgän ide. Ul da şul uq köndä ul da cirlände.

AQŞ prezidentı George Bush Cmail üterelep berniçä säğät ütü belän ük monıñ öçen Dimäşq belän Tährannı ğäyepläde.

"Bez Liban premyer ministrı Fuat Sionora xökümäten, häm andağı demokratiäne, Liban xalqınıñ tınıçlıqta yäşäw telägen yaqlıybız. Bez alarnıñ demokratiäne yaqlaw tırışlığın, Süriä, İran häm berektäşläreneñ bu möhim ildä totrıqsızlıq häm köç qullanunı köçäytü tırışlıqlarına qarşı toruın yaqlıybız. Min bu üterü artında kemnärneñ, nindi köçlärneñ toruın açıqlaw öçen monı tulısınça tikşerergä çaqıram" dide Bush.

Dimäşqtäge räsmi basmalar isä ministr Cmailneñ üterelüennän barı Libandağı Süriägä qarşı xökümätkä genä fayda kilä dip yazıp çıqtı.

Naif Aqmal, Praga.
XS
SM
MD
LG