Accessibility links

Кайнар хәбәр

Därdmändne iskä alu çaraları başlandı


Başqortstanda kürenekle tatar şağire, metsenat, cämäğät eşleklese häm eşquar Zaqir Rämievne – Därdmändne iskä alu çaraları başlanıp kitte. Ber atna buyı däwam itäçäk mädäni çaralarnıñ berençese comğa könne Ufada, Başqortstan däwlät universitetında oyıştırıldı. Biredä, tatar tele häm ädäbiäte bülege möğallimnäre häm talipları başlanğıçında, Därdmändneñ tormış yulına häm icatına bağışlanğan fänni-ğamäli konferensiä bulıp ütte. Anda küp kenä qızıqlı çığışlar berse, universitetnıñ tatar tele kafedrası möğallime Marat Şäripov belän Därdmänd könnäre programması xaqında äñgämä qordıq.



“Şunısı qızıqlı – bu konferensiädä Därdmändneñ tuğannarı, abıysı şakirnıñ onıqları, üzeneñ onıqları qatnaştı, di Marat Şäripov. - Bu isä bezneñ cıyınğa tantanalılıq östäde. Küp kenä qızıqlı çığışlar buldı. Başqortstan Mädäniät ministrlıysınnan, Başqortstannıñ UNESKO oyışmasınnan, Başqortstan Yazuçılar berlegennän kilgän yazuçılar matur çığış yasadı”



Tağın nindi çaralar kötelä Därdmänd könnäre qısalarında?

- 27 noyäber könne Ufanıñ Akterlar yortında sänğät'le itep şığır söyläwçelär bäygese ütä. Ä 30 noyäber könne inde Başqortstan däwlät opera häm balet teatrında tantanalı zur kiçä bula.

Tatar ğalime äytüençä, kiläçäktä Başqortstanda Därdmändneñ istälegen mäñgeläşterü yünäleşendä baytaq eşlär kötelä. “Därdmänd mirasınıñ qaytuı” digän kitap çığaru, Ufada Därdmänd muzeyın açu küzdä totıla, - di Marat äfände. – Şulay uq “Bertuğan Rämievlar” isemendäge premiä buldıru, Därdmänd isemen mäktäplärgä, şähär häm awıl uramnarına birü, ul yäşägän urınnarda istälek taqtaları urnaştıru eşläre niätlänelä”.

Fänis Fätxi, Ufa

XS
SM
MD
LG