Accessibility links

якшәмбе, 4 декабрь 2016, Казан вакыты 15:17

Kem ul İndiğo balaları?


Balanıñ dönyağa kilüe - ata-ana öçen iñ zur şatlıq, iñ bäxetle mizgelder. Qazanlılar Aliä belän Röstäm öçen älege mizgellär tağı da onıtılmas buldı. Sabıynıñ küzlärenä qarağaç, alar säyersenep quydı. Yaña tuğan balanıñ qaraşı tügel ide anda. Citdi küzlär ata-anağa töbälep qaradı. Malay üste, üskändä isä ata-anasın, tärbiäçelären tağı-tağı aptıraşta qaldırdı. Ul üz yäştäşlärennän härwaqıt 4-5 yäşkä olıraq kebek buldı. Beleme, xätta analitik fiker yörtüe bik sizelä ide. Yäştäşläre belän isä uynamıy, alar belän urtaq tel taba almıy. Aña olı keşelär yanında bulu küpkä qızıqlıraq. Malaynıñ yäştäş dusları siräk bulsa da bulğaladı anısı, ämma alarnı ul bik yaqın kürep, annarı ränci ide. Bik xisle bala häm şul uq waqıtta bik töple - eşlägänen cirenä citkerep eşli, bernidän dä qurıqmıyça bar närsäne dä üze buldırırğa tırışa. Alay ğına tügel, bu malay äle üze tumağan çaqlarda bulğan äyberlär turında, monnan alda bulğan tormışı xaqında da söyli. Alar xaqında bäyän itkändä ul närsäneder iskä töşergän sıman bula.

Bu yuqqa ğına tügel. Süz İndiğo balası xaqında bara. Yaña tördäge balalar. Alar böten dönyada da bar. İñ berençe İndiğo balaları 70 yıllar axırında dönyağa kilä. Bu sabıylar tuğanda uq üz yäştäşlärennän bik üzgä bula. Ämma bu balalarnı küplär añlamıylar. Keşene bit äzer ber sistema buyınça tärbiälilär. Mondıy balanı isä nindider qısalarda üsterep bulmıy. Ul bu dönyağa nigä kilgänen üze yaxşı belä häm üz eşen tormışqa aşıru öçen barlıq köçen dä quya. Bu balağa kiräkmägän äyberne öyrätü faydasız. Şuña kürä balalar baqçasında, mäktäptä, ä annarı olı tormışta da alarnıñ problemaları şaqtıy bula. Därestä utırğanda uqıtuçınıñ xataların tözätep utırğan uquçı kemgä oşıy? Yäğni alar uñaysız balalarğa äylänä. İndiğo balaları üz ata-anasınnan küpkä aqıllıraq bula. Alarğa yul ğına birergä genä kiräk. Annarı isä alar bik talantlı ğalimnär, säyäsätçelär, artistlar, arxitektorlar, uqıtuçılar bulaçaq. Ämma ber qalıpqa salınğan tärbiä bu balanıñ mömkinleklären çikli. Şundıy añlaşınmawçılıq Qazan yegete belän dä buldı. Xäzer ul citkän yeget inde. Ämma bu tormışta äle üz mömkinleklären tulısı belän qullana almağan. Tabiplar isä İndiğo digän balalarnı ğomumän tanımıy. Alarğa psixik awıru diagnozın quyıp, alar bu tormışta bolay da bik küp problemalarğa duçar bulğan balalarnı awır xälgä quya.

Psixoanalitik Rinat Baltaçev isä bolay dip sanıy:

Böten balalarnı da İndiğo balaları dip atarğa bula minemçä. Böten balalar da sälätle. Ämma üskändä alarnıñ teläkläre, mömkinleklärenä iğtibar birelmi qaywaqıt. Şulay itep, qayber ata-analar analitik fikerläw säläte bulğan baladan käsepçe yasarğa mataşa häm mondıy misallar bik küp. Bala isä irekle üsärgä tieş. Aña nindider basım yasarğa, qomaçawlarğa berniçek tä yaramıy. Çönki andıy balanıñ barlıq mömkinlekläre dä açılmıy qala. Bu eşkä bik citdi qarap, ata-ana, cämğiät balağa tormıştağı üz urının tabarğa yärdäm itärgä tieş.

Al'bina Zäynulla

XS
SM
MD
LG