Accessibility links

пәнҗешәмбе, 8 декабрь 2016, Казан вакыты 01:16

Mäskäwdä matbuğat kürgäzmäse


Mäskäwdä bu könnärdä Bötenrusiä kürgäzmälär üzägendä iseme ük cisemen beldergän “Matbuğat 2007” dip atalğan kürgäzmä eşli. 14 tapqır uzdırıla torğan bu kürgäzmädä, Rusiäneñ barlıq töbäklärendä basıla torğan köndälek matbuğat, gazeta-juranallar da qatnaştı häm bu kürgäzmädä iñ yaxşı dip atalğan basmalar büläklärgä dä iä buldı.

Bıyılğı kürgäzmädä Başqortstan respublikası ayırım ber urın alıp tordı. 23 noyäber köne kürgäzmädä Başqortstan köne dip iglan itelgän ide. 24 noyäbr könne üzeneñ 100 yıllığın bilgelägän “Başqortstan respublikası” gazetası häm “Kitap” näşriäten täqdim itü dä buldı. Bu oçraşuğa Başqortstan yazuçıları bulıp ta Mäskäwdä torıp icat itüçe yazuçılar: Azat Abdullin, Cämil Mostafin häm başqalar kilgän ide. Başqortstan qunaqları bu kürgäzmägä şulay mul itep, äzerlänep kilülären kiläse yılda bilegelänäçäk, Başqortstannıñ Rusiä däwlätenä quşıluğa 450 yıl tulı belän bäylilär.

Äytep ütelgän basmalarnı täqdim itüne alar teatrlaştırıp alıp bardılar. Başqortstannan Çepkin isemendäge teatr studiäsendä uquçılar matbuğat bäyrämen Mostay Kärimneñ “Rus tügel, läkin Rossiän min” digän şiğere belän başlap cibärdelär. Milli kiemnän bulğan asıl qızlar kilgän xalıqnı qımız, çäkçäk belän sıyladı. Bu kürgäzmä häm alda torğan bäyräm turında Başqortstan jurnalistları citäkçese, “Hänäk” jurnalı baş redaktorı Marsel Sälimov, 450 yıllıqqa bağışlanğan çaralar turında da, respublika gazetaları alğan büläklär xaqında da söyläde.

Büläklärgä layıq bulğan gazeta-jurnallarnıñ qayberlären atap, mäsälän, Yanawıl rayon gazetası, Sibay, Ziänçura gazetaları, barısın da belep tä betermim inde, qaytqaç beleşergä bulır dip östäde. “Kitap” näşriäte citäkçese Ğäliä xanım Ğäliewa 450 yıllıqqa bağışlap 20 dän artıq basma dönya küräçäk, şularnıñ berse Başqortstanda yäşäp icat itüçelärneñ 6 teldä, 6 millät wäkilläreneñ yazmaları kergän kitap ta näşer iteläçäk, dide.

Kürgäzmädä Mäskäwdä yäşäp icat itüçe tanılğan yazuçı Azat Abdullin belän söyläşü forsatı da buldı. Min añardan Başqortstan belän bäyläneşlär niçek, kitaplarığız basılamı, sezgä nindi mönäsäbät dip soradım. Ul, “Kitap” näşriäte rus telendä ber tomlıq äsärläremne çığarğan ide inde, xäzer bu kürgäzmägä alar başqort telendä basılğan kitabımnı da alıp kildelär. Miña mönäsäbät äybät. Min qänäğät dip belderde. Azat Abdullin şulay uq Germaniädä anıñ “13 räis” dip atalğan pyesası quyılğanın da söyläp aldı. Şulay itep Başqortstan matbuğatı Mäskäwdä kiläse yılğa bilgelänäçäk, Rusiägä quşılularınıñ 450 yıllığın bäyrämen Mäskäwdä başlap cibärde.

Näzifä Kärimova, Mäskäw

XS
SM
MD
LG