Accessibility links

дүшәмбе, 5 декабрь 2016, Казан вакыты 03:39

Çallıda tatar iseme taba almıylar


Älege kunakxanä binası Çallıda iñ tarixlı, iñ ozaq tözelgän häm xalıq telendä bik küp mäzäklär tudırğan qorılma. Anıñ tözelä başlawına da 30 yıldan artıq waqıt ütep kitte. Biredä 15 yıl çaması bernindi tözeleş eşläre alıp barılmawın da äytep kitärgä kiräk. Aqça bulmağan. Monnan 10 yıl çaması elek şähärneñ elekke xäkime Räfgat Altıynbaev kürsätmäse belän, şuşı tügäräk binanıñ soñğı qatın qızıl, yäşel häm aq töslärgä buyap quyalar. Bu waqiğadan soñ kemneñder ciñel tele belän qorılmanı "tübätäy" dip yörtä başlıylar. Urıslar isä "tyubeteyqa" dilär. 2000 yıllar başında şuşı tübätäy yortqa Tatarstan prezidentı M.Şäymiev ta iğtibar itte häm Çallığa bulğan ber säfäre waqıtında 22 qatlı älege binanı ber eşmäkär xanımğa 1 sumğa satıluı xaqında belderep kitkän ide. Läkin alış-bireş yuridik oyışmalar tarafınnan räsmiläşterelmäde. İnde, 2005 yılda, älege zur tözeleş kompleksın Mäskäw kompaniäläre belän xezmättäşlektä bulğan "Siti sentr" firması satıp ala häm şunduq tözeleş eşlären dä yañartıp cibärde. 25 qatlı kunakxanäneñ 22 qatında 100 keşegä isäplängän, äylänep toruçı restoran, iñ yuğarıdağı bülmälär prezident nomerlarına tiñ bulır dip farazlana. Çallı öçen ğäcäyep bulğan älege kompleksnıñ iseme yuq bit äle. Döres, isem quyu öçen baytaq qına eşlär dä başqarıldı. Mäsälän cäy köne, yaña kunakxanägä isem uylap tabu öçen konkurs ta iğlan itelde häm ciñüçegä 25 meñ sum aqça bireläçägen dä äyttelär. Küptän tügel isem quşu bäygesenä yomğaq yasaldı häm näticälär qızıq, yäğni ciñüçe yuq. 25 meñ sum aqça wäğdä itep bäygene oyıştıruçılar äytüençä, alarğa 3 meñnän artıq isem variantı kergän häm şularnıñ bersen dä bulaçaq kunakxanägä layıklı dip tapmağannar. Bäyge şartları buyınça, kunakxanä iseme ciñel äytelä torğan ike süzdän artmasqa, milli häm internatsional'' koloritnı üz eçenä alırğa tieş. Älege bäygedä studentlar da, uqıtuçılar häm tel belgeçläre, eşçelär häm injenerlar da qatnaştı. Äytkänemçä, yaraqlı isem täqdim itüçe yuq. İsem bäygesendä "Watanım Tatarstan" gazetasınıñ Çallıdağı xäbärçese Räis Zaripov ta qatnaşqan. Ciñüçelärneñ bulmawı bilgele bulğaç, "Azatlıq"qa mondıy fikerlären citkerde:

"Çallı şähäreneñ simvolına äylängän kunakxanä kompleksnıñ iseme tatar yañğıraşında bulırğa tieş. Bezdä matur isemnär küp, minemçä, tatarça atamanı birergä telämilär. Tatar telenä küpme dan, mädxiä cırlana. Ä menä bulaçaq mähabät kunakxanäseneñ isemen tatarça itü öçen süzlär yuq ikän." Jurnalist Räis Zaripov äytüençä, tizdän, isem quşu bäygeseneñ 2 öleşe başlanırğa mömkin, häm anda qatnaşırğa teläge barlığın da yäşermäde. Älegä kunakxanä "tübätäy" iseme belän qala.

Ğafiulla Ğaziz, Çallı

XS
SM
MD
LG