Accessibility links

якшәмбе, 4 декабрь 2016, Казан вакыты 23:34

Törek yäşläre Rim Papasına mömkinlek birergä çaqıra


Rim papası Benedikt XVnıñ sişämbe könne Törkiägä başlanaçaq säfäre tiräsendä farazlar häm kierenkelek arta bara. Yäşlär bu şäxeskä häm anıñ säfärenä nindi qaraşta tora?

Benedikt XV Törkiägä kilgänçe ük anıñ säfärenä qarşı bulğan meñlägän keşe uramnarğa çıqtı. Ämma yäşlär arasında, Rim papası säfärendä – tatulaşu işaräsen kürüçelär dä bar. İstanbul universitetı talibäse Özlem Karcı:

"Rim papasınıñ küpçelege möselman yäşägän Törkiägä kilüenä qurqası yuq, dip uylıym, çönki bu cirlär – bik küp dinnär bişege häm bu adımnı ul tınıçlıq xaqına eşli ala, Rim papası eşli alğan iñ yaxşı eş."

Törkiäneñ könyağında, Süriä çige buyında universitetta uqığan Maral Güneş tä, xäzer könbatış belän möselman dönyası arasında kierenkelek bolay da zur, Rim papasına söyläşergä mömkinlek birergä kiräk, dip sanıy:

"Minemçä bu säfär xristiannar häm möselmannar dönyalarınıñ ikese öçen dä möhim. Bügenge köndä Rim papası başqa ber möselman ilenä dä bara almıy, alar berse dä anıñ belän oçraşırğa äzer tügel, häm bälki bu säfärne Törkiä öçen uñış dip äytep bula torğandır. Ämma Rim papasınıñ säfäre sirat küpere aşa uzuğa tiñ. Qaywaqıt ul telen tıya almıyça möselmannarnı mısqıl itkän süzlär äytä. Anıñ säfärenä äzerme – yuqmı, ul kilgäç närsä bulır – äytä almıym."

Ämma töreklärne Rim papasınıñ möselmannarğa mönäsäbäte genä borçımıy. Törkiädä xristian patriarxı Bartolomey 1nçe İstanbulda – keçe Vatikan qorır digän qurqu bar. Däwlät eçendä däwlät tözelsä, kördlär dä üzlärenä bäysezlek dawlıy başlar, digän farazlar bar. Şuña küplär Rim papası säfärendä säyäsi maqsat ta kürä.

Säfärgä qarşı bulırğa tağın ber säbäp bar – Benedikt, 2003nçe yılda, äle Rim papası bulğançı, Fransiäneñ Le Monde gazetına birgän äñgämäsendä, Törkiäneñ Yevropa Berlegenä kerüenä qarşı çıqqan ide. Ämma bügenge köndä küplär Vatikannıñ Yevropa Berlege eşlärenä yoğıntı yasıy aluı şikle, dip sanıy. Törkiä Rim papasına üzeneñ qunaqçıllığın qızğanmas, ämma abruyın saqlar, di töreklär.

Alsu Qormaş
XS
SM
MD
LG