Accessibility links

шимбә, 10 декабрь 2016, Казан вакыты 08:14

Mari respublikasında millätçelär cäberlänä


Marilarnıñ ictimaği oyışmasına, anıñ aktivistlarına höcüm itülär ike yıl elek, respubliqa başlığın saylawlardan soñ köçäyep kitä. Saylawlarda “Mariy Uşem” oyışması wäkilläre Leonid Markelovnı tügel, başqa nämzätne yaqlıylar. Ämma saylawlarda Markelov ciñä häm milli oyışma wäkillären ezärlekläw başlana. Alarnı qinıylar, qurqıtalar. Ä “Mariy Uşem” oyışmasınıñ eşçänlegen qanunsızlıqta ğayıpläp, şuşı yılnıñ 8 noyäberendä oyışmanı yuridik terkäwdän töşerdelär.

Ä bu aralarda tağın ber mari keşesenä ğayıp taqtılar. Mariy respublikasınıñ jretsı yäğni qartı Vitaliy Tanakov millätara häm dinara nizağlar çığaruda ğayıplänä.

İdelbuyı häm Uralda tanılğan ideolog, marilar dine belgeçe Vitaliy Tanakov marilarnıñ dine, anıñ nigezläre häm kiläçägenä bağışlanğan kitapçıq çığarğan. Bu kitapta Tanakov mari dineneñ üseşen başqa dinnär belän çağıştırıp kürsätä. Respublika prokuraturası isä Vitaliy Tanakov marilar milläten, dinen başqalardan östen quya diep, cinayät eşe quzğattı. Federal' iminlek xezmäteneñ Mari respublikası bülege wäkilläre millätara häm dinara nizağqa kiterüçe älege kitapnı taratu öçen “Mariy Uşem” oyışması citäkçese Nina Maksimovağa da eş quzğattı.

Ekspertiza öçen älege basma Qazan däwlät universitetına cibärelgän. Universitet xezmätkärläre isä kitap çınlap ta milli wä dini nizağlar çığara digän näticä çığarğan. Ekspertlarnıñ kübese tatar keşeläre bulğan. Marat Mölekov isemendäge Bötentatar ictimaği üzäge wäkilläre bu tatarlarnı marilarğa qarşı quyu öçen maxsus eşlänä dip belderä.

“Keşe häm qanun” töbäkara ictimaği oyışmasınıñ Mariy Eldağı bülege citäkçese Sergey Poduzov mäxkämä utırışında Mariy El qartı Vitaliy Tanakovnı yaqlayaçaq. Sergey Poduzov söyli:

Bezneñ uyıbızça, prokuratura üz wäkälätlären arttırıp, dini traditsiälärgä bik tiränten kergän. Keşe xoquqların yaqlawçı Yevropa mäxkämäse qararı buyınça da bu röxsät itelmi. Häm bezneñ oyışma Vitaliy Tanakovnı keşe xoquqların bozuçı däwlät orğannarı wäkillärennän yaqlap çığa

Mäxkämä Vitaliy Tanawovqa nindi qarar çığarır älegä bilgele tügel. Kiläse mäxkämä utırışı 30 noyäbergä bilgelängän.

Al'bina Zäynulla

XS
SM
MD
LG