Accessibility links

пәнҗешәмбе, 8 декабрь 2016, Казан вакыты 09:08

Qazan Tatarstannıñ xalıq şağire Mödärris Äğläm belän xuşlaştı


28 noyäber könne Qazan Tatarstannıñ xalıq şağire Mödärris Äğläm belän xuşlaştı. Xuşlaşu märäsime Qazannıñ S. Säydaşev isemendäge Zur konsertlar zalı binasında uzdı. Anıñ belän xuşlaşırğa kiñ cämäğätçelek cıyılğan ide: Tatarstannıñ citäkçeläre dä, Däwlät Şurası deputatları da, xakimiät wäkilläre dä häm ğomumän tatar zıyalıları, student yäşlär, mäktäp uquçıları häm ğomumän anıñ şiğriäten söyuçelär kilgän ide.

Xuşlaşu märäsimendä berençe süz Tatarstannıñ Däwlät Şurası räise Färit Möxämmätşinğa birelde. Ul şağirgä bulğan yaqtı xisläre belän urtaqlaştı häm Mödärris Äğlämne bik qäderläp “Ul ütker süzle, bäysez telle” şağir ide. Anıñ belän xuşlaşu bar tatar öçen bik awır häm bu bik zur yuğaltu” dide.

Xuşlaşu süzlären şulay uq TR Yazuçılar berlege räise İlfaq İbrahimov anıñ turında şiğri süzlär belän “.... Ul üze dä näq ber şiğer ide, ul üze dä ülmäs şağir bulıp qalaçaq”,- dide. “Qazan utları” jurnalınıñ baş redaktorı Rawil Fäyzullin anıñ turında: “Şağir bularaq ul bik bäxetle şağir, üze telägänen qurıqmıyça yaza aldı,- dide.

Zäy rayonınıñ rayon başlığı urınbasarı Ğosman Mäxmütov şağir belän ğorurlanuın belderde.

Şağirneñ yaqın sabaqtaşı kürenekle şağir Razil Wäliev Mödärris Äğlämgä bağışlap yazğan şiğeren uqıdı.

“Awaz kilde Aqqoş küllärennän:

Sawbullaştı soñğı aqqoşım

Aq qayrıylar bulıp iñde cirgä

İñde canğa xalqım aqqoşı.

Yañğırlarda aqqa kümär öçen

Cir yarası sıman güreñne

Qazan bügen aq- qarlarğa tügel

Aq käfengä güyä törende”....br>

Respublikanıñ Premyer -ministr urınbasarı mädäniät ministrı Zilä Wälieva xuşlaşu cıyının tämamlağanda Mädärris Äğlämneñ “Qan tamırın kistem” digän kitabınnan şağirneñ üze turında yazğan süzlären xalıqqa uqıp işetterde. Häm ätisen soñğı yulğa ozatırğa Sank- Peterburgtan qaytqan ulı - İdelgä, Qazanda yäşäwçe qızı- Aygölgä häm tormış iptäşe- şağirä Näcibä Safinağa awır qayğıların urtaqlaşuın belderep , alarğa zur sabırlıq häm tüzemlek teläde. Mädärris Äğläm belän xuşlaşuda, kiläçäk buınğa bay miras qaldırğan şağirneñ yaqtı istälege xalıq küñelendä mäñge saqlanır, digän fikerlär yañğıradı.

Mödärris Äğläm Yaña bistädäge tatar ziratına cirlände.

Mälikä Basıyr

XS
SM
MD
LG