Accessibility links

Кайнар хәбәр

Rim Papası Benedikt XVI Änkarada


Törkiäneñ üzendä häm möselman dönyasında Rim Papasınıñ İslam turında äytkän qarşılıqlı süzläre äle dä xäterdä. Ämma Törkiäneñ katolik ruxanienä tağın ber däğwası bar – Rim papası Änkaranıñ Yevropa Berlegenä kerüenä qarşı buluın beldergän ide. Aldan bik küp qarşılıqlar tudırğan Benedikt XVInıñ Törkiägä säfäre bügen başlandı.

Änkara şähäre Rim Papasın zarığıp kötep aldı dip äytüe qıyın. Başta telämiçä genä anıñ belän qısqa ğına waqıt eçendä hawa alanında uq Törkiä premyer-ministrı Recep Tayyıp Erdoğan oçraştı. Belgeçlär, ziräk aqıllı katolik ruxanieneñ Törkiägä dinnär ara dialog öçen genä kilgänänenä ışanmıy. Anıñ köntärtibe küpkä kiñeräk. Rim papası İslamda reformalarğa çaqıraçaq dip kötelä. Rim papasın küptän inde yaxşı belgän, Vatikanda çığuçı İnside the Vatikan digän jurnalnıñ baş möxarrire Robert Moynihan:

"Minemçä ul bik açıq itep äytte, Regensburgta yasağan çığışında ul İslamnı Qoränne täfsirlärgä çaqırdı, bu bik awır häm qatlawlı eş, ämma ul moña çaqıra."

Möselmannar qolağına bu çaqıru niçek işetelde soñ? Britan katolik ruxanie David Barchard, bu süzlär – qatı äytelgän ide, dip belderde:

"İslamda çınnan da räncü ğädäte bar. Häm çınnan da Rim papasınıñ süzläre İslam dinendä iñ izge keşelärneñ bersen räncetügä yaqın ide. Xäzer menä bu – dialog dip äytlälär, ämma min monı kübräk - qarşılıq dip bäyälär idem."

Alay da, Papanıñ säfären – dinnär ara dialogka taba adım dip bäyäläwçelär kübräk. Törkiäne borçığan başqa mäsälä dä bar, ul da bulsa – Yevropa Berlege belän mönäsäbätlär. Mäğlüm bulğança 2003nçe yılda, ul çaqta kardinal bulğan Joseph Ratzinger, Fransiäneñ Le Monde gazetına, Törkiäneñ berlekkä kerüenä qarşı bulğanın beldergän ide. Katolik ruxanieneñ Yevropa illärenä yoğıntı yasıy alu säläte bar, dip farazlana. Bu ayda Yevropa Komissiäse, Änkaranı, süz irege torışı, xatın-qızlar häm azçılıqlar xoquqların yaqlamawda täñqitläp, säyäsi reformalarnı tizlätergä çaqırğan ide.

Sişämbe könne kiç Rim Papası Benedikt XVI Törkiäneñ din eşläre ministrı Ali Bardakoğlu belän bulğan oçraşuda, üz säfäreneñ maqsatın menä niçek bäyäläde:

"Barıbızğa da mäğlüm, bu säfärneñ maqsatı – dialog häm qardäşlek, mädäniätlär ara añlaşu. Tarixnıñ bu awır çorında bu cawaplılıqnı barıbız da toyabız."

Rim Papası Benedikt XVInıñ Törkiägä säfäre 1nçe dikabergä qadär däwam itäçäk. Bu säfärne aldan uq belgeçlär "tarixi" dip bäyäläde. Soñğı tapqır katolik çirkäweneñ elekke başlığı İoann Paul İkençe Törkiägä 1979nçe yılda kilgän ide.

Alsu Qormaş
XS
SM
MD
LG