Accessibility links

дүшәмбе, 5 декабрь 2016, Казан вакыты 05:40

Rim Papası Benedikt XVI Törkiäneñ Yevropa Berlegenä kerüen teläde


Bügen Rim papası Benedikt XVInıñ Törkiägä säfäreneñ ikençe köne ide. Sişämbe könne katolik ruxanie möselmannar belän söyläşkän bulsa, bügen ul üz iğtibarın Törkiäneñ xristian azçılığına yünältte.

Patriarx belän oçraşqançı, Rim Papası İzmirğa barıp Efesta Ğäysä päyğämbärneñ anası Märyam ana yäşägän dip farazlanğan çirkäwdä doğa qıldı, Törkiäneñ xristian azçılığına üz mäxäbbäten belderde:

"Bu säfärem belän min Törkiädäge keçkenä xristian cämäğätçelege belän yaqın buluımnı, köndälek tormışta küp awırlıqlar kürgän keçkenä azçılıqqa mäxäbbätemne belderäm."

Patriarx belän oçraşu urını – İstanbul, elekke Konstantinopol şähäre ide. Bu söyläşülärne belgeçlär, xristiannarnıñ ike çirkäwe arasında mönäsäbätlärne yaxşırtu, elek qarşılıqlar bulsa da, bügenge köndä urtaq qurqınıçqa qarşı köräştä berläşü, dip bäyäli. İke çirkäwgä dä yanağan qurqınıç isä – Yevropa illäreneñ torğan sayın dinnän kübräk ayırıluı, dönyawi cämğiätlärneñ nığuı.

Sişämbe könne Benedikt XVI Törkiäneñ din eşläre ministrı Ali Bardakoğlu belän oçraşqan ide. Papanıñ sintäberdä äytkän islam dinenä külägä töşergän süzläre oçraşuda telgä alınmadı. Bardakoğlu, İslam – tınıçlıq dine, dip belderde:

"Bez möselmannar, köç qullanu häm terrornıñ, anıñ kemgä qarşı buluına qaramastan, häm kem tarafınnan qılınuına qaramastan, kisken täñqitlibez häm anı keşeçelekkä qarşı cinäyät dip sanıybız."

Törkiä matbuğatı bügen Rim papasınıñ kiçä äytkän ber süzen därräw kütärep alıp dönyağa tarattı. Benedikt XVI, katolik çirkäweneñ säyäsi role yuq, ämma Törkiägä Yevropa Berlegenä kerergä teläk belderde.

Rim Papası kiler aldınnan İstanbulda meñlägän keşe qatnaşında uzğan säfärgä protest çaraları tındı. Sişämbe könne Änkarada tınıç uram cıyını uzdı.

Ul arada bügen Brüsseldä Yevropa Komissiäse, Törkiäneñ Yevropa Berlegenä kerü söyläşülären kiçekterergä täqdim itte. Berlekneñ 25 äğza ilneñ tışqı eşlär ministrları kiläse ayda sammitqa cıyılıp komissiäneñ bu täqdimen qarayaçaq. Kiçekterüneñ säbäbe – Törkiäneñ üzendäge diñgez portların Qıprıs köymälärenä açudan baş tartuı. Mäğlüm bulğança, Qıprıs – Yevropa Berlege äğzase.

Alsu Qormaş
XS
SM
MD
LG