Accessibility links

дүшәмбе, 5 декабрь 2016, Казан вакыты 23:45

“Tatar cırı 2006” festivalendä çırlar törle yaqlap bäyälänäçäk


İnde bilgele bulğança, yıl axırında tatar estradasında şaqtıy qızıqlı ber çara uza. Ul uzğan yılnıñ iñ populyar cırları bäygesenä näticä bularaq oyıştırıluçı Tatar cırı festivale. Monda tamaşaçılar tarafınnan uzğan yılda icat itelgän cırlarnıñ iñ populyarları bilgelänä häm älege cırlarnıñ başqaruçıları büläklänä. Mondıy çara 2006 yılnıñ dekaber ayında da ütkäreläçäk. Şul uñaydan uzğan matbuğat oçraşuında jurnalistlar sorawlarına Bars-Mediä şirkäteneñ citäkçese Marat Gäräev, Rusiä Tatarlarınıñ milli-mädäni avtonomiä räise Rimzil Wäli häm cırçı Dilä Nigmatullina cawap birdelär.

Oyıştıruçılar süzlärenä qarağanda, konsert bıyıl da, inde 7 yıl rättän Piramida küñel açu üzägendä 2 kön däwamında ütäçäk. 20 dekaber könne yäş cırçılar häm tanılğan estrada artistları qatnaşuında “Yoldızlar fabrikası”, ikençe könne, 21 dekaberdä “Altın bars” xalıq premiäsen tapşıru tantanası häm Tatar cırı 2006 laureatları qatnaşlığında ğala-konsert uzaçaq. Matbuğat oçraşuında tamaşanıñ başqa yıllardan ayıralmalı yaqların Bars-Mediäneñ citäkçese Marat Gäräev atap uzdı.

“Başqa yıllarda yıl eçendä populyar cırlar büläklänä ide häm alar 15-20 ide, ä bıyıl isä ul 17 nominatsiädä uza. Äytik alar: 2006 yılnıñ iñ yaxşı cırı, yıl açışı, iñ yaxşı çit il cırçısı, iñ xalıqçan cırçı, iñ yaxşı al'bom, iñ yaxşı cır, iñ yaxşı cırçı, iñ yaxşı klip, iñ yaxşı muzıykal' törkem, xalıq mäxäbbäte häm başqalar. Häm ul şunıñ belän ayırılıp tora. Bu tatar estradasın törle yünäleşlärdä alğa alıp barırğa mömkinlek biräçäk dip uylıym. Yañadan-yaña ürlärgä menär öçen mömkinlek biräçäk. Säxnä bizäleşe buyınça da häm bügenge köndä tatar estradasında iñ köçle artistlarnıñ buluı buyınça da başqa mondıy yuğarılıqta ütkärelä torğan tatar estrada cırı festivale yuq bügenge köndä.”

Bıyılğı festival'neñ byudjetı 10 million sumnan artıq buluı, anıñ texnik yaqtan cihazlanuı, iñ populyar rus häm çit il festival'lärennän dä kim bulmasqa wäğdä itä.

Tatar cırı festivale 7 yıl eçendä küp kenä yäş cırçılarğa zur säxnägä berençe adımnarın yasarğa yärdäm itte. Äytik, tatar estradası Güzäl Urazova, Dilä Niğmätullina, Mälikä, İlnar Säyfiev, Salawat Miñnexanov isemnäre belän bayıtıldı. 6 yıl eçendä 51 cırçı häm estrada törkeme “Tatar cırı” lawreatı buldı, ä “Yoldızlar fabrikası” ike yıl eçendä 24 yaña isem açtı.

Matbuğat oçraşuında isä jurnalistlar Bars-mediä şirkäteneñ al'ternativ tatar muzıkasına qarata fikerlären beleşte.

“Bügenge köndä Tatar cırı festivaleneñ törle naminatsiädä ütüe – ul kompaniäneñ tatar estradasındağı törle yünäleşlärne alğa atlawnıñ berençe adımnarı. Menä uzğan yıl bez rep stilendä cırlawçı Şäkürne çığardıq säxnägä, Zölfiä Kamalova kilde. Min anı bötenläy al'ternativ muzıka dip äyter idem. Al'ternativ muzıkağa bez pozitiv yaqtan ğına qarıybız. Çönki törle muzıka bezneñ bazarnı ğına kiñäytäçäk.”

Festival'neñ bülägenä kilgändä, yıldağıça ciñüçe cırçılarğa yuğarı büläk itep altın, kömeş häm bällür qullanıp yasalğan Altın bars sını tapşıralaçaq. Ä menä cırlarnıñ köy häm süz avtorlarına zalda tamaşa qılırğa ğına qala. Monı Marat Gäräev bolay dip añlattı.

“Bez bügenge köndä tatar estradasında bulğan böten artistlar belän dä eşlibez. Rekords kompaniä ul bit inde al'bomnar çığara. Älege cıyentyqlarğa kergän cır avtorlarına belän bez bik tığız mönäsäbättä eşlibez. Yıl däwamında kompaniä millionnan artıq cırnıñ süz häm köy avtorları gonorar tüli. Ä Tatar cırı festivalendä avtorlarnı bez qunaq itep kenä çaqıraçaqbız.”

Axırda, isä oyıştıruçılar festival'neñ büläkläw tantanasın tağın da maturraq häm ğädelräk yasarğa dip wäğdä ittelär.

Gölnaz Şäyxetdin

XS
SM
MD
LG