Accessibility links

дүшәмбе, 5 декабрь 2016, Казан вакыты 07:31

Senatornıñ wäkälätläre tuqtatıldı


Başqortstan Däwlät Cıyılışı-Qorıltay atnakiç könne üzeneñ çirattağı utırışın ütkärde. Anıñ kön tärtibenä utızdan artıq mäsälä kertelgän ide. Küpçelege yaña qanunnar ölgelären qaraw, elekkelärenä üzgäreşlär kertü. Şulay da ähämiätlelege häm cämäğätçelek diqqäten üzenä tartqanı qanunnar tikşerü tügel, ä qayber oyıştıru-kadrlar almaştıru mäsäläse ide.

Aldan uq xäbär itelüençä, bu utırışta, Başqortstannıñ Rusiä Federatsiä Şurasındağı senatorı İğor İzmestyevnıñ wäqälätlären aldan tuqtatu qaralırğa tieş ide. Bu xälne Başqortstan parlamentı deputatları üz möräcäğätlärendä räsmi itep İzmestyev äfändeneñ eşquarlıq belän dä şöğellänüe häm ber şirkätkä citäkçelek itüe belän bäyläp añlattı. Ä bu xäl qanun buyınça senator keşegä yaramıy ikän. Ämma ğäyre räsmi çığanaqlar Başqortstan senatorınıñ başqa xilaf eşlärgä qatnaşı buluı xaqında da xäbär itkäläde. Matbuğatta da bu xaqta mäğlümatlar çıqtı. Başqortstan prezidentı da İzmestyevnıñ wäqälätlären tuqtatu öçen fatıyxasın birep quyğan, digän farazlar da äytelde. Şuña da bu mäsälä aldan uq xäl itelep quyılğan kebek qabul itelä ide.

Şulay da İğor İzmestyev üzenä tağılğan ğäyeplärneñ uydırma buluın belderä kilde. Ufada älege utırış başlanır aldınnan da Başqortstan deputatlarınıñ üzen senator itep qaldıraçağına ömeten özmägän ide äle. Üzenä qarata tağılğan ğäyeplärne ul kemnärneñder zakazı dip atadı. “Azatlıq” xäbärçesenä birgän ayırım äñgämäsendä dä şul fikeren äytte ul.

Başqortstan Däwlät Cıyılışı başlanır aldınnan “Azatlıq”qa birgän äñgämäsendä İzmestyev äfände bu utırışta üzenä dä süz bireler häm ul üzen yaqlap, köçle dälillär kiterä alır, dip ömetlänüen äytkän ide. Ämma ömete aqlanmadı, senatorğa süz birelmäde häm deputatlar zur küpçelek tawış belän anıñ wäqälätlären waqıtınnan alda tuqtatu öçen rizalığın birde.

Ämma İzmestyevnıñ senator bulu-bulmawına soñğı süzne äle Rusiä Federatsiä Şurası äytergä tieş. Başqortstan parlamentınıñ İzmestyev äfändene senatorlıqtan alu qararına Federatsiä şurası räise Sergey Mironov şunda uq üz añlatmasın da birgänlege mäğlüm buldı. “Federatsiä şurası İgor İzmestyevnı senatorlıqtan töşerü mäsäläsen qayramayaçaq, - dip beldergän ul. – Matbuğatta yazılğannarğa qarap qına bu mäsäläne xäl itmäyäçäkbez. Ä älegä bezneñ qulda Başqortstan senatorına külägä töşererdäy bernindi dokument ta yuq”.

Deputatlar tağın ber kötelmägän ğämäl qıldı bu utırışta. Alar Başqortstannan Rusiä Federatsiä Şurasındağı ikençe wäkil – Rudik İskujinnı da wazıyfalarınnan buşattı. İñ qızığı şul - anıñ wäqälätläreneñ ni öçen şulay aşığıç tuqtatıluı säbäben äytüne bötenläy dä kiräksenmädelär. Rudik İskujin urınına anıñ familiädäşe Ramil İskujin täğäyenlände. Moñarçı berniçä yıl Başqortstan Prokurorı urınbasarı wazıyfaların başqarğan ide ul.

Başqortstan Qorıltayı utırışında başqa mäsälälär belän berrättän 2007 yılğa däwlät qaznası qanunı da beryulı ikençe häm öçençe uquda tikşerelde häm qabul itelep tä quydı.

XS
SM
MD
LG