Accessibility links

Кайнар хәбәр

Muzey xezmätkärläre berlege tözelerme?


Muzey citäkçeläreneñ kiñäytelgän utırışı yıl sayın uzıp kilä, ämma bu yulı ul şaqtıy bay eçtälekle buldı. Çönki öç kön däwamında respublika muzey citäkçeläre plenar utırışta, tügäräk östäl, fänni-ğamäli seminarlarda qatnaştılar. Şulay uq muzey xezmätkärläre Milli muzeyda bıyıl ğına eşli başlağan "Tatarstannıñ borınğı tarixı" daimi ekspozitsiäse belän dä tanıştılar, Qazanda uzuçı mädäni çaralarğa da teläp yördelär. Bolardan tış mädäniät ministrlıysında muzeyçılarğa bağışlanğan maxsus kollegiä utırışı uzdı.

Utırışta qayber muzey citäkçeläre dä çığış yasadı. Alar üzläreneñ muzey eşçänlege häm borçığan mäsäläläre turında söylädelär. Nigezdä alarnıñ barısın da muzeylarnı zamança cihazlandıru, mäsälän, multimediä taqtası, İnternet-kafelar buldıru, şulay uq, eksponatlarnı yañartu, muzey xezmätkärläreneñ xezmät xaqın arttıru, suvenir produktsiä çığaru kebek inde küptän aktual' bulğan mäsälälär borçıy.

Azatlıq radiosı Şura eşçänlegendä qatnaşqan berniçä muzey citäkçese belän dä aralaşıp aldı. Alar üzläreneñ muzey tormışları häm şura eşçänlegeneñ möhimlege turında söylädelär.

“Layış yağı muzeyı bulğaç, bez Layışnıñ öyaz tarixın, Layışnıñ şähär tarixın kürsätäbez. Häm Derjavinnıñ icat häm tormış yulın kürsätäbez. Problemalarğa kilgändä, xäzer töbäk muzeylarına eksponatlar satıp alır öçen aqça birelmi, bez keşedän –keşegä yörep alarnı cıyabız. Annarı muzey xezmätkärläreneñ xezmät xaqı bik tübän. 3000 sumğa eşlägän keşegä, minemçä, häykäl quyarğa kiräk. Häm menä şular bergä cıyılu bezgä bik möhim. Bez monda ber-berebez belän aralaşıp, täcribä büleşäbez. Häm gär dä bez bergä bulmasaq bez tarqalabız. ”

Muzey citäkçelären ayıruça muzeylarnıñ matdi xäle borçıy. Älege mäsäläne çişü yulın Milli muzey citäkçeseneñ urınbasarı Rafael' Väliev täqdim itte. Ul bezgä kem dä bulsa yärdäm itär dip kötep yatarğa tügel, ä üz tırışlığıbız belän investorlar, eşmäkärlärne cälep itü östendä eşlärgä kiräk dip belderde.

Muzeylar şurası wäkilläre süzlärenä qarağanda, xäzerge waqıtta iñ töp mäs'älä - Muzey xezmätkärläre berlegen tözü. Yazuçılar, Kompozitorlar berlekläre ürnägendä muzeyçılarnıñ da mänfäğäten qayğırtuçı oyışma buldırılsa, alarnı borçığan problemalarnıñ kübese ciñelräk çişeler ide, dip sanıy alar.

Gölnaz Şäyxetdin

XS
SM
MD
LG