Accessibility links

пәнҗешәмбе, 8 декабрь 2016, Казан вакыты 05:03

Litvinenko ülemen tikşerüçelär London-Mäskäw oçqıçlarında nurlanış taqpan


Rusiäneñ elekke FSB ofitserı Londonda nurlanışlı ağulanudan wafat bulğan Aleksandr Litvinenkonıñ säyer üleme tiräsendä yaña täräqqiät bar. Atnakiç Britan räsmiläre Mäskäw belän London arasında oçqan oçqıçlarda nurlanış ezläre tabıluın xäbär itte. Litvinenko üzen naçar xis itä başlağan könne anıñ belän Londonda oçraşqan keşe dä şuşı oçqıçlarnıñ bersendä oçqan bulğan. Räsmilär bu oçqıçlarda oçqan keşelärgä tikşerü ütergä çaqıra.

Aleksandr Litvinenkonıñ säyer üleme tiräsendäge cäncal atnakiçtä yaña borılış aldı. Britan räsmiläre British Airways kompaniäse oçqıçlarında nurlanış ezläre tabıluın xäbär itte:

"Bezneñ ike oçqıçta - Boeing 767 oçqıçlarında – nurlanışlı matdä ezläre tabıluı raslandı. Başta öç oçqıç tikşerelde, ikesendä bik az külämdä nurlanış ezläre tabıldı" di British Airways wäkile Willie Walsh.

Bu ike oçqıç xäzer Londonnıñ Heathrow alanında. Tağın ber, 3nçe Boeing Mäskäwneñ Domodedovo hawa alanında. Atnakiç parlamentta yasağan çığışında Britaniäneñ eçke eşlär ministrı John Reid wäzğiät açıqlanıp betmi torıp ul oçqıç qaytarılmayaçaq, dide. Monnan tış Reid Londonda nurlanış ezläre tabılğan urınnarnıñ sanı 12gä citüen äytte:

"Älegä qädär 24 urın tikşerelde, şularnıñ 12sendä zararlanu ezläre tabıldı" di Eçke eşlär ministrı.

Litvienenko polonium-210 matdäse belän ağulanğan dielde. Oçqıçlarda nindi matdä tabıluın räsmilär älegä äytmi, läkin anıñ Litvinenko eşen tikşerü qısalarında tabıluın yäşermi.

Nurlanış däräcäse tübän disälär dä, räsmilär bu oçqıçlarda oçqan keşelärne tikşerü ütergä kiñäş itä. Andıy yulçılar sanı distä meñnär belän isäplänä. Noyäber ayında bu oçqıçlar, Mäskäwdän tış Yewropanıñ tağın 8 şähärenä yörgän. Willie Walsh süzlärençä, barlığı 221 reis başqarılğan, anda 33 meñ yulçı oçqan. Bu reislarnıñ isemlege kompaniäneñ internet säxifäsendä.

Şuşı yulçılar arasında elekke KGB ofitserı Andrei Lugovoy da bar. Noyäberneñ 1ndä ul Millenium qunaqxanäse barında Litvinenko belän oçraqşan. Kommersant gäzitenä äytüençä, Noyäberneñ 3ndä ağulı oçqıçlarnıñ bersendä Mäskäwgä qaytqan. Lugovoy Litvinenkonıñ ağulanuına nindi dä bulsa qatışı buluın kire qağa.

Kremlneñ kisken tänqitçese bulğan Litvinenkonıñ Londondağı üleme zur şaw-şu tudırdı. Anıñ dusları häm ğailäse monı maxsus oyıştırılğan üterü dip atıy. Alar äytüençä, Litvinenko üler aldınnan Rusiä prezidentı Vladimir Putinnı ğäyeplägän belderü qaldırğan. Kreml bu ülemgä qatışı buluın qatğıy kire qağa.

Britan politsiäse älegä monı "üterü" tügel, "säyer ülem" dip bäyli. Britan yağı tikşerü eşendä Rusiä yağınnan yärdäm soradı. Britan premier-ministrı Tony Blair, bu eşne "bik citdi" dip atadı häm anı tikşerüdä bernindi säyäsi, diplomatik kirtälärgä yul quyılmayaçaq, dip wäğdä itte.

Ali Ğilmi
XS
SM
MD
LG