Accessibility links

дүшәмбе, 5 декабрь 2016, Казан вакыты 05:26

Rim Papası häm Pravoslav Patriarxı ike çirkäwne yaqınayta


Rim Papası Benedikt XVI Törkiägä säfäreneñ öçençe könendä pravoslav patriarxı Bartolomey belän bergä doğa qıldı. İstanbulda Izge Georgiy çirkäwendä, ber meñ yıl ber bersennän yıraq torğan ike çirkäw arasında qarşılıqlarnı yomşartu tırışlığı yasaldı.

Dönyadağı 1 millard katoliknıñ yulbaşçısı Benedikt XVI häm 250 million pravoslavnıñ wäkile Konstantinopol patriarxı Bartolomey bergä torıp doğa qıldı, annarı añlaşılmawçanlıq çıqmasın öçen şunda uq, bu yaxşı ğämäl ide, ämma ike çirkäw arasında yaqınayunı añlatmıy, digän belderü belän çıqtı.

Alay da katoliklar belän pravoslavlar arasındağı qarşılıqlarnı kimetü prosessı başlanğan, di belgeçlär. Häm bu eşkä etärgeçne tarixçı Robert Moynihan menä niçek añlattı:

"Xristian dinenä ike yaqlap qurqınıç yanıy, berse – sekularizm, yağni dingä iğtibar itmäwçelär, ikençese – xristian dineneñ qayber täğlimätlären kire qaqqan İslam dine."

Patriarx Bartolomey – çığışı belän Gresiädän bulğan Tärkiä watandaşı. Ozaq yıllar ul Törkiä räsmiläreneñ basımına qarşı çığışlar yasap kilde. 1971nçe yılda İstanbulğa yaqın bulğan seminariä yabıldı. Bu din mäktäbe pravoslav ruxaniläre öçen zur ähämiätkä iä ide. Üz ruxanilären uqıta almağan İstanbulnıñ pravoslav çirkäwe aqrınlap ülä bara. Rim Papası säfäre maqsatlarınıñ berse – İstanbuldağı pravoslav çirkäwen yaqlaw, di Törkiä belgeçe David Barchard:

"Rim Papası İslam cämğiätlärendä möselman bulmağan azçılıqlarnı qıyırsıtu bulğanın belä, häm xäzer, küräseñ, nindider çaralar kürü waqıtı citkänen sizä."

Yevropa Berlege dini ireklekne taläp itä, şuña da Bartolomey Törkiäneñ Berlekkä kerüen yaqlıy. Patriarx häm Rim Papası ikese dä Yevropanı Törkiägä işeklären açırğa çaqırdı.

İke çirkäw dä, alarğa ber törle qurqınıçlar yanıy, dip sanıy. Sekularism – dönyawilıq häm cämğiätneñ ählaqi normalarınıñ üzgärüe. Ğämäldä isä bolar ber cenes keşeläre arasındağı mönäsäbätlär häm nikaxlar, niqaxqa qadär censi mönäsäbätkä kerülär, bala töşerü häm balalar pornografiäsenä qağıla.

Katolik çirkäwe başlığı Benedikt, fän häm dönyawilıqnı, uzğan ğasırda keşeçelek dönyasına yanağan ike zur qurqınıç, nazizm häm kommunizm belän ber däräcägä quya.

Katolik çirkäwen ber genä keşe citäkläsä, pravoslav xristiannarınıñ çirkäw tözeleşe başqa törle. Barlığı 15 bäysez pravoslav çirkäwe bar. Häm pravoslav çirkäweneñ säyäsät belän qatnaşqan buluı küzätelä.

Benedikt XVI Rim papası İoann Paul İİneñ Mäskäwgä baru xıyalın tormışqa aşırırmı? Belgeçlär – eye, di. May ayında Vatikanda Rus pravoslav çirkäweneñ tışqı mönäsäbätlär bülege başlığı metropolit Kirill bulıp kitte, üktäber ayında Mäskäwgä italyan kardinalı Dionigi Tettamanzi bardı.

Ämma "National Catholic Reporter" isemle AQŞ basmasınıñ Vatikandağı xäbärçese John Allen, ike çirkäw arasında zur säyäsi häm mädäni qarşılıqlar bar, dip sanıy:

"Çın problemalar küpkä tiränräk. Ber yaqtan alar säyäsi häm mädäni. Rusiädä häm, üzen rus millätçelegeneñ yaqlawçısı dip sanağan pravoslav çirkäwendä xäzer könbatışqa qarşı qaraş köçäyde. Häm älbättä katolik çirkäwe häm Rim papasında şiklänü bar. "

Niçek kenä bulmasın, Rim Papasınıñ İstanbulğa säfäre – ike çirkäwne yaqınaytu yulında alğa taba adım dip bäyälänä ala, di belgeçlär.

Bügen kiç Rim Papası Benedikt XVİ İstanbuldağı Aya Sofia muzeyında häm Sultan Äxmät möçetendä buldı. Anıñ Törkiägä säfäre comğa könne tämamlana.

Alsu Qormaş
XS
SM
MD
LG