Accessibility links

Кайнар хәбәр

Başqortstan tatar uqıtuçıları kiñäşmäse tämamlandı


Başqortstannıñ Kuşnarenko rayonında tatar tele häm ädäbiätı uqıtuçılarınıñ respublika kiñäşmäse başlanuı xaqında xäbär itkän idek. İke köngä isäplängän şuşı kiñäşmä comğa könne dä däwam itte häm “tügäräk östäl” söyläşüe belän kiçen tämamlandı.

Respublikanıñ distälärçä rayonınnan kilgän yözdän artıq mäktäp uqıtuçıları, metodistlar, şulay uq Ufadağı yuğarı uqu yortlarınnan tanılğan möğallimnär qatnaştı bu kiñäşmädä.

“Tatar telen häm ädäbiäten uqıtunıñ zamança alımnarı” dip atalğan kiñäşmädä täcribä urtaqlaşu tatar uqıtuçılarına faydağa bulaçağı şiksez. Comğa könne uqıtuçılarnıñ kiñäşmäsenä Ufadan tatar milli oyışmaları wäkilläre dä kilde. Alar anda çığış yasap, tatar uqıtuçıları öçen bik küñelle xäbär citkerde. Şuşı uqu yılınnan Başqortstanda tatar uqıtuçıları arasında da “Yıl uqıtuçısı” isemenä respublika bäygese ütkärelä başlıy. Bu başlanğıç belän Başqortstan Tatar milli-mädäni moxtariäte çıqtı. Älegä mondıy bäyge respublika Xökümäte yärdämendä başqort tele uqıtuçıları arasında ğına ütkärelä ide. “Tatar uqıtuçıları arasında da şundıy uq bäyge oyıştırunı sorap küp tapqırlar möräcäğät itsäk tä, respublika citäkçelege monı işetmämeşkä salıştı, şuña kürä dä xäzer bez bu eşne üz qulıbızğa alırğa buldıq”, - di Başqortstan Tatar milli-mädäni moxtariäte räise Ramil Bignov.

Ramil Bignov fikerençä, Başqortstan tatar uqıtuçılarınıñ abruyın kütärü, alarnı yaqlaw öçen, respublika tatar oyışmaları başqa törle çaralarnı da qullana ala. Ämma xökümät yağınnan yärdäm bulmağaç, barı tik sponsorlıq aqçasına ğına älläni maytarıp bulmıy, di ul. Älege dä bayağı Başqortstanda tatar teleneñ statusın kütärü probleması bu xäldä alğa çığıp basa.

Fänis Fätxi, Ufa

XS
SM
MD
LG