Accessibility links

җомга, 2 декабрь 2016, Казан вакыты 21:11

Tabiplar Radik Xäbirovnıñ terelergä ömete yuq dip sanıy


Radik Xäbirovnıñ qıl östendä torğan yazmışı xaqında söylägän idek, xörmätle tıñlawçılar. Näq ber yıl elek 19 yäşlek Qazan yegete Irınbur ölkäseneñ Totsk garnizonına xezmät itärgä kilä. Ämma bilgesez säbäplär arqasında Xäbirov ike tapqır xärbi bülektän qaça digän mäğlümatlar bar. Monnan soñ yegetne xärbi gospital'neñ psixiatriä bülegenä urnaştıralar. Gospital'dä Radik üz üzenä qul sala. Anı qotqaralar. Häm yeget märtkä kitä. Ämma bolar xaqında yegetneñ tuğannarına xäbär itmilär. Armiädä yeget 50killogramğa yabığa. Şundıy bik awır xäldä Radik Qazanğa qaytarıla.

Şuşı yılnıñ 12 iyülendä Totsk xärbi garnizonı prokurorı cinayät eşe quzğata. Tikşerülär başlana. “Ağora” töbäkara xoquq yaqlaw Assotsiatsiäneñ wäkile Rämil Äxmätgaliev Radik Xäbirovnı yaqlaw belän şöğellänä. Şuşı waqıtqa qädär yeget märtkä kitkän xäldä qala dip söyläp kilde tabiplar. Ämma anıñ xäle tağı da qatlawlı bulıp çıqtı. Bu könnärdä psixiatriä ekspertizasınıñ qayber mäğlümatläre bilgele buldı. Alar xaqında Rämil Äxmätgaliev söyli:

Yegettä baş mie qabığınıñ üleme küzätelä. Ekspertlar aña şundıy diagnoz quydı. Bu yegetneñ ülemen añlatmıy. Radik äle isän, anı däwalıylar, şuña kürä ömet bar.

Ämma tabiplar kiresen äytä. Yegetneñ terelüenä ömet inde yuq. Ekspertizanı uzdırğan psixiatr Artem Ozerski “Rossiyskaya gazeta” xäbärçesenä äytüençä, Xäbirovnıñ yuğarı psixik eşçänlege inde mömkin tügel. Ul barı tik şulay yatıp qına tora ala. Häm başqalar yärdämennän başqa yäşi almıy.

Tikşerülär isä monıñ belän tämamlanmıy. Tabiplar yegetneñ armiägä qädär psixik awırular bulu bulmawın, üz üzenä qul saluınıñ säbäplären açıqlarğa tırışa. İnde xäbär itüebezçä, armiägä qädär ük Radik ruxi yaqtan sälämät bulmağan dip şiklänälär. Ekspertiza närsä kürsäter, älegä bilgesez. Anıñ näticäläre kiläse atnağa bilgele bulaçaq dip kötelä.

Radiknı iñ yaxşı belüçe anıñ üz ätise Säyetgäräy Xäbirov. Xäzer anı tıñlap kitik:

Radik sälämät ide. Ul sport belän şöğellänä ide. Xärbi bülekkä cibärgänçe Saratovta uqıttılar alarnı, anda da tikşerep sälämät digän näticä çığarğannar ide. Ägär sälämät bulsa anı armiägä dä almaslar ide inde. Armiägä kitkändä anıñ awırlığı 73 kilo ide, qaytqanda isä 26 ğına buldı.

Al'bina Zäynulla

XS
SM
MD
LG