Accessibility links

шимбә, 10 декабрь 2016, Казан вакыты 00:27

Ğiraqta qorbannar sanı arta bara


Ğiraq Berläşkän Millätlär Oyışmasnıñ xalıqara tınıçlıq konferensiäse ütkärü täqdimen kire qaqtı. Prezident Cäläl Talabani BMO general sekretare Kofi Annannıñ mondıy konferensiä ütkärü täqdimen kire qağuın belderde.

Anıñ belderüendä Ğiraqta indi säyäsi protsesslar bara häm töbäk öçen iñ yaxşı bulğan parlament bar dielä. Talabani şulay uq Ğiraq inde bäysez suveren däwlät häm ilneñ kiläçägen Ğiraq üze bilgeliäçäk di.

Şimbä könne Bağdad yanında çit il suğışçıları sıyınğan urınnı AQŞ köçläre hawadan utqa tottı. 5 suğışçı, 2 xatın häm ber bala ülde.

Yullarda mina şartlatular, intixar höcümnäre häm başqa köç qullanular bügen dä däwam itte. Tönyaqtağı Läylän şähärendä tikşerü qapqasında intixarçı bomba şartlatıp 3 politsiä xezmätlären üterde.

AQŞ xärbiläre yağınnan şimbä könne 2 urında 3 soldat hälak bulğan.

Kiçä Bağdadnıñ şığıylar öleşendä bombalı 3 maşina şartlawdan hälak bulğan 50-dän artıq ğiraqlını cirläw eşläre bara. Bügen şartlaw urınnarındağı xäräbälärne buldozerlar häm uram cıyıştıruçılar çistarttı.

Noyäber ayında ğına da Ğiraqta tınıç xalıq arasında qorbannar sanı 3700-dän artıq bulğan. Dikäber başındağı üterülärgä qarağanda yılnıñ soñğı ayında da qorbannar sanı kimemäskä oxşıy.

Kiçä kiç Bağdadnıñ uram säwdäse barğan urınnarında ber-berse belän bäyle 3 şartlaw buldı. Xädüm Sadun isemle ber şahit bolarnı söyläde.

"3 maşina şartladı. 2-se Sadriada, berse Bağdad üzägendäge äl-Watba mäydanında. Ülüçelär häm yaralanuçılar bik küp buldı" dide Sadun.

Ul şartlawlarda 90-nan artıq keşe yaralandı.

Aldağı atnada AQŞ Kongressında 2 partiä wäkillärennän tözelgän, elekke däwlät sekretare James Baker citäkçelegendäge komissiä AQŞ prezidentı George Bushqa Ğiraq strategiäsen üzgärtü täqdimnären iğlan itär dip kötelä.

Uzğan ayda wazıyfasınnan kitkän elekke AQŞ saqlanu ministrı Donald Rumsfeldnıñ , kitär aldınnan yazğan yazması matbuğatqa sarqıp çıqtı. Ul Ğiraq strategiäsen üzgärtergä kiräk. AQŞ xärbiläre xäzer Ğiraqta bik ük yaxşı yäki bik ük tiz eşli almıy dip yazğan bulğan.

Bu atnada Amman Ğiraq premyer ministrı Nuri äl-Mäliki belän oçraşudan soñ Bush min häm äl-Mäliki iminlek problemasın beläbez, Ämma äl-Mäliki ğisyançılarğa qarşı köräşü öçen kiräkle barlıq mömkinleklär belän täemin itelmägän dide.

Naif Aqmal, Praga.
XS
SM
MD
LG