1-2 dekaber könnärendä Yekaterinburg şähäre zur säyäsi waqiğalar tä'sirende yäşäde. Bigräk tä ölkä tatar milli tormışına bitaraf bulmağan keşelär öçen Ural cirenä Tatarstan respublikası prezidentı Mintimer Şäymiev, Tatarstan däwlät sovetı räise Färit Möxämmätşin, Bötendönya tatar kongressı başqarma komitetı räise Rinat Zakirov kebek zur qunaqlar kilüe olı waqiğa buldı.
Respublikanıñ berençe citäkçeläre bötenrossiä külämendä uzdırılğan zur säyäsi forumda qatnaşsa, Bötendönya tatar kongressı başqarma komitetı räise Rinat äfände Zakirov üz säfären tatar milli tormışınıñ aktual' mäsälälärenä bağışladı. Ul Sverdlovski ölkä xökümäte räiseneñ sotsial' säyäsät buyınça urınbasarı Vladimir Vlasov, mäğärif ministrı Valeriy Nesterov, mädäniät ministrı Natal'ya Vetrova belän oçraştı. Oçraşuda şulay uq Sverdlovski ölkä Zakonnar cıyılışına saylanğan tatar deputatları Nail' Şäymärdanov, Rinat Sadriev, Al'bert Abzalov qatnaştılar.
Söyläşüne başlap cibärgändä, Vladimir Aleksandroviç Vlasov Tatarstan qunağın sälämläde häm Rossiäneñ ike qüätle regionı arasındağı Kileşüneñ ütäleşenä qağılıp ütte. Vladimir Aleksandroviç äytüençä, ölkä xökümäte san buyınça ikençe urında torğan tatar xalqınıñ milli mänfägat'lären iğtibarsız qaldırmıy häm kiläçäktä dä härdaim iğtibar üzägendä totarğa äzer.
Tügäräk östäl artında süz mäktäplärdä pravoslavie däreslären mäcbüri kertügä mönäsäbät, küpmillätle häm küp konfessiäle ildä tolerantlıq nigezlären saqlıy belü problemaları turında bardı. Vlasov äfände ölkädä inde berniçä yıl rättän uzdırıla torğan Ural xalıqları bäyrämenä, ölkä Sabantuyı, tatar cırı festival'lärenä tuqtalıp ütte. Mädäniät ministrı Natal'ya Vetrova milli mädäniätne üsterüdä milli oyışmalar belän bik tığız elemtädä eşläwlären belderde. Natal'ya Konstantinovna bilgeläp ütkänçä, urtaq eşkä milli oyışmalar arasındağı tarqawlıq qomaçawlıy. Ul kiñäşmädä qatnaşuçılarnıñ iğtibarın bu citdi problemağa yünältte.
Rinat Zakirov mädäniät ministrına tatar mädäniäten üsterüdä kertkän xezmäte öçen zur räxmät belderde häm Sverdlovski ölkäsendä eşläp kilgän tatar xalıq kollektivların Qazan säxnäsendä çığış yasarğa çaqırdı.
Annan soñ süz milli mäğärif problemalarına küçte. Rinat Zakirov üzeneñ çığışında Samara, Saratov, Mäskäw, Penza, Ul'yanovski şähärlärendä tatar gimnaziäläre eşläw ürnäge turında söyläp uzdı häm Yekaterinburg şähärendä dä prestij tatar gimnaziäse buldıru problemasın kütärde. Ämma mäğärif ministrı Valeriy Nesterov fikerençä, biredä tatar gimnaziäse tözergä äle irtäräk. Valeriy Veniaminoviç monnan berniçä yıl elek ministrlıqnıñ Krasnoufim pedagogik kolledjında häm Ural däwlät pedagogika institutında tatar tele bülege açu omtılışınıñ kilep çıqmawın häm Yekaterinburg mäktäpläreneñ bersendä tatar klassı açıp qaraw buyınça başlanğıçı xalıq tarafınnan yaqlaw tapmawı turında iskä töşerde.
Ministr äytüençä, tatar xalqı üze balaların tatar klassına kiterergä telämi. Bu eştä xalıqnıñ milli üzañı citep betmi. Ul ölkädäge milli mäğärif torışı bügenge köndä tatar awılları mäktäplärendä tatar tele däresläre uqıtıluı däräcäsendä ikänlegen äytep ütte.
Rinat Zinnuroviç Zakirov fikerençä, şähär cirendä tärbiälänüçe balalar öçen tatar klassları açu citmi, tatar mäktäbe kiräk. Şul uq waqıtta bu mäktäp prestij, törle çit tellärne tiränten öyränä torğan bulsın. Deputat Rinat äfände Sadriev balalarnı prestij tatar gimnaziäsenä äzerläw öçen eşne tatar balalar baqçasınnan başlarğa kiräk dip belderde. Ul bu eşkä centekläp totınğanda milli balalar baqçasın açıp, annan soñ tatar gimnaziäsen buldıru mömkinçelekläre turındağı fikerlären äytep uzdı.
Küp kenä fiker alışulardan soñ, cıyıluçılar bu mäsäläne öyränep eşli başlar öçen dekaber ayınnan uq maxsus eş törkeme tözü turında kileştelär. Rinat Zakirov bu eştä Tatarstan yağınnan härdaim yärdäm bulaçağın belderde.
Fäwiä Safiullina, Yekaterinburg
