Accessibility links

чәршәмбе, 7 декабрь 2016, Казан вакыты 23:21

Açıq mikrofon: Federatsiä Şurası äğzaları saylanırğamı, ällä bilgelänergä tieşme?


"Berdäm Rusiä" firqase qorıltayında çığış yasağanda, firqäneñ Yuğarı Şurası räistäşe Sergey Şoyğu Federatsiä Şurası äğzaların saylaw turındağı qanunnı qabul itärgä täqdim itte. Sergey Şoyğu qorıltayda bu qanunnı öç uqılışta qabul itärgä häm marttağı saylawlarda senatorlarnı bötenxalıq tarafınnan saylarğa täqdim itte. Tatarstan Prezidentı da firqadäşeneñ täqdimen yaqladı. Häm Mintimer Şäymiev beldergänçä, al'ternativ kandidaturalarnı tege yäki bu subyekt citäkçese dä, ictimaği oyışmalar da täqdim itä ala. Senatorlarnı xalıq saylarğa tieş. Kiläçäktä bu Rusiä parlamentınıñ yuğarı palatasına ışanıç qına tudıraçaq. Şul uq waqıtta Şura äğzaların saylaw prinsibı buyınça bügen bäxäsläşergä dä mömkin. Şuña kürä bu mäs'älä tirän tikşerüne taläp itä, dip belderde Tatarstan prezidentı.

Ä menä qazanlılar fikerençä federatsiä şurası äğzaları saylanırğamı, ällä bilgelänergä tieşme?

Minemçä, Federatsiä Sovetına da keşelärne xalıq saylarğa tieş. Çönki xalıq riza tügel ikän, ul üzeneñ rizasızlığın barıber belderäçäk.

Bötenesen dä quarğa kiräk alarnıñ. Deputatlarnı da, senatorlarnı da. Eşsezlär utıra anda.

Min şäxsän älege fikerne xuplıym. Federatsiä Şurasına senator saylaw xalıq isemennän bulsa, ışanıçlıraq bulır ide.

Äye, min monıñ belän kileşäm. Çönki elekke senatorlarnıñ kübese inde yañadan bilgelände. Ä xalıq saylasa, senatorlarnı bilgeläw eşe yaxşıraq bulır ide.

Minemçä, bu bik döres fiker. Çönki xalıqnıñ härwaqıtta da üz fikere bar. Häm anı äytüneñ yulı – saylawlar, dip uylıym. Däwlät kenä bilgelärgä tieş tügel, xalıq ta üz süzen äytep, üze telägän keşene bilgelärgä tieş.

Federatsiä Sovetı Däwlät Dumasınnan şunıñ belän ayırıla da bit inde. Anda wäkillärne däwlät üze quya. Ä Däwlät Dumasın xalıq saylıy. Şuña kürä şul Däwlät Duması bulmasın öçen, Federatsiä Sovetı ayırılıp torırğa tieş barıber.

Minem fikeremçä, senatorlarnı xalıq saylarğa tieş, ildä az bulsa da demokratiä bulırğa tieşter bit inde. Bolay da yuq bit inde ul.

Böten Yevropa illärendä şulay, Amerikada da şulay. Şuña kürä bez dä demokratik il bulırğa telibez ikän, xalıq üze turında qayğırta torğan keşelärne üze saylarğa tieş.

Xalıq üze saylıy bit inde Däwlät Dumasın, ä Federatsiä Sovetına däwlät üze belgän keşelärne saylıy. Bu şulay bulırğa tieş tä. Min Şäymiev süzläre belän kileşmim.

Xäzerge waqıttan saylatu kölke bulıp toyıla. Çönki kem saylanılasın aldan uq belälär. Xalıq isä bu oçraqta – qurçaq qına.

Min Şäymiev süzlärenä ışanam. Ul äytkän ikän, dimäk ul anı uylap äytä, şulay bulırğa tieş.

Faydasız bu. Xalıq berkemgä dä ışanmıydır inde. Xalıqqa nindi yaxşılıq eşlägännäre bar soñ alarnıñ? Alar üzlären genä qayğırtalar.

Güzäl Zıyätdinova.

XS
SM
MD
LG