2 nçe dekaber Ufada ike qarşılıq çarası uzdı. İkese dä ber ük urında häm ber ük waqıtta ütte. Çaranıñ bersen respublikanıñ oyışqan oppozitsiäse uzdırdı. Ul mäktäplärdä mäcbüri başqort telen uqıtu, kommunal' tüläwlär üsüe häm Rusiädä mäğärifne avtonomiäläşterügä qarşı oyıştırıldı. Çarada ike genä çığış yasaldı. Alarnıñ bersen Başqortstan tatarları milli-mädäni möxtäriäte räise urınbasarı Mäcit Xucin, ikençe çığışnı kommunistlar firqäsennän Radmir Yangirov yasadı. Alar Başqortstanda referendumğa quymıy ğına mäcbüri başqort telen uqıtu xalıq fikere belän isäpläşmäw dip belderde. Başqort telen uqıtu başqa möhim fännär uqıtu isäbenä dide. Çığış yasawçılar Rusiädä yuğarı uqu yortlarında qazna isäbenä uqıtu urınnarı qısqaruğa häm kommunal' tüläwlär üsügä, yaña toraq kodeksına qarşı da çığış yasadı.
Şul uq waqıtta Ufa xakimiäte qarşındağı Lenin mäydanında uzğan ikençe qarşılıq çarasında qatnaşuçılar Rämil Bignovnı utqa tottı. Alar üzlären Bignovtan aldanğan aqça saluçılar dip belderde häm xakimiättän aqçaların qaytarıp birüdä yärdäm taläp itte. Başqortstan televideniese älege qarşılıq çarasın ğına töşerde häm tamaşaçılarğa kürsätte.
