Accessibility links

сишәмбе, 6 декабрь 2016, Казан вакыты 15:21

Litvinenko ülemen tikşerüçelär Mäskäwgä barırğa ciyına


Elekke FSB offitserı Aleksandr Litvinenkonıñ ülemen tikşerü eşe, Britaniä çiklärennän çığıp, xalıqara däräcägä qädär üsep citte. London politsiäse wäkilläre, ütkän atnada Quşma Ştatlarda bulıp, ikençe elekke FSB offitserınnan mäğlümat alıp qayttı. Xäzer Britaniä tikşerüçeläre, Mäskäwgä barıp, Litivinenko belän oçraşqan öç Rusiä keşesennän soraw alırğa ciyına

Brtianiä tışqı eşlär ministrı äytkänçä, tikşerüçelär Mäskäwgä barır öçen vizanı alğan häm bügen üq yulğa çığarğa äzer. Xäbärlärdä äytelğänçä, Britaniä politciäse wäkilläre, Mäskäwdä Litvinenko turında mäğlümatı bulğan 3 keşe belän söyläşergä planlaştıra. Alar - Andrey Lugovoy, Dmitriy Kovtun häm Vyaçeslav Sokolenko. Alar Litvinenko belän, ul awırıp kitkän 1 noyäber könne oçraşqan bulğan. Alar Litvinenko ülemenä bäyle buluları turındağı ğäyebne kire qaqtı.

Britaniä eçke eşlär ministrı John Reid, Yevropa Berlege ministrları oçraşuında, bu eşneñ barışı turında bolay di:

Britaniä politsiäse soraw aluların däwam itü öçen Rusiägä barırğa ciyına häm kiräk bulğan här cirgä baraçaq. Diplomatiä häm törle farazlarğa qaramastan, tikşerü ğädättäğeçä däwam itäçäk.

Ğäzitlär xäbär itkänçä, London şähär politsiäse yäğni Scotland Yard wäkilläre, ütkän atnada Quşma Ştatlarğa barıp Litivenko mäsäläsendä elekke KGB xezmätkäre Yuriy Şvetsqa sorawlar birgän bulğan. Ul, Associated Press agentlğına Brtitaniä offitserları belän oçraşuın raslağan. Şvets, ağentlıqqa şulay uq , tikşerüçelärgä Litvinenko üleme artında tora alğan keşeneñ isemen atawı turında da äytkän.

Tikşerü eşläreneñ çitkä çığuı, Mäskäw belän London arasında yörgän oçqıçlarda häm Yevropa buylap distädän artıq başqa urında da nurlanış ezläreneñ tabıluı belän dä bäyle. Litvinenko awırıp kitkän könne, anıñ belän oçraşqan 4nçe keşe dä bula. Anıñ tänendä polonium 210 mätdäse tabıla. İtaliäle Mario Scaramella xäzer Londonda, xastaxanädä tikşerenülär ütä. Ul üze äytkänçä, ul alğan nurlanışnıñ küläme, keşene ütererlek dozadan 5 tapqırğa kübräk, ämma tabiplar Scaramellanıñ xäle äybät di. Nurlanış ezläreneñ London şähärendä häm oçqıçlarda tabıluı belän, Britaniädä cämäğätçelekneñ qurquı da arta. Britaniäneñ eçke eşlär ministrı, Brusseldäge oçraşuda, sälämätlek öçen qurçınıç yuq, dip tınıçlandırırğa tırışqan ide.

Tikşerüçelär Litvinenko eşen çişüdän yıraq. Xäzerge waqıtta, federal imenlek xezmäteneñ elekke xezmätkäreneñ üleme artında ni tora aluı turında küp sanlı farazlar bar.

Litvinenkonıñ dusları häm ğailäse, bu Kreml oyıştırğan uç alu bulğan, dip sanyı. Litvinenko Britaniägä 2000 yılda, Rusiä xökümäten qatı tänqitlägän soñ küçep kilgän. Ul Kremlne, bomba şartlatu, terror ğämällären häm ütereşlär oyıştıruda ğäyeplägän ide. Litvinenko üzeneñ soñğı xatında, üzeneñ ağulanuında Rusiä Prezidentın ğäyepläde.

Vladimir Putin, şuşı xatnı xalıq arasına çığarğan öçen Britaniä xakimiätlären tänqitläp çıqtı. Ul Kremlneñ Litvinenko ülemendä qatnaşlığı bulu mömkinlegen kire qaqtı. Rusiä räsmiläre şulay uq, Britaniä xakimiätlären, Litvinenko cäsadın tikşerü näticälären kürsätergä telämäwe öçen tänqitli.

Litvinenko cänazasınıñ köne şulay uq bilgele tügel. Dusları, nurlanış taralmasın öçen anıñ tabutı törelep kümeläçäk, di. Litvinenkonıñ ätise äytkänçä, anıñ ulı möselman göref-ğädätlär belän cirlänüne telägän bulğan. Çeçen internet saytları, Litvinenko islam qabul itkän bulğan dip tä yaza, ämma anıñ ätise, bu xäbärne raslamyı.

Bikä Timerova.
XS
SM
MD
LG